Afgedankte werkers moor twee

Afgedankte Anglo American Platinum (Amplats)-werkers het Donderdag glo twee mense vermoor nadat hulle vroeër ook twee taxi’s naby Rustenburg aan die brand gesteek het.

Amplats het op 5 Oktober sowat 12 000 mynwerkers afgedank omdat hulle vir meer as drie weke lank aan ‘n onwettige staking deelgeneem het. Volgens die mynbestuur is dié stap gedoen nadat die betrokke werkers nie hul tugverhore bygewoon het nie.

Die afgedankte werkers het vandag in Nkaneng bymekaar gekom en gewelddadig geraak. “ʼn Man is tydens die voorval aan die brand gesteek en is op die toneel dood. Nog ʼn persoon is twee keer geskiet, hy is onderweg na die hospitaal dood,” het brigadier Thulani Ngubane gesê.

Die polisie het spoedig reageer en 40 mense vir openbare geweld in hegtenis geneem. Volgens Ngubane is die situasie nog spanningsvol. Die polisie het motoriste versoek om die gebied te vermy.

Die werkers eis dat bedrywighede by die Bathopele-myn gestaak moet word.