ʼn Motorfietsryer is Vrydag op die R36 Lydenburg-pad, ongeveer 7 km buite Tzaneen in Limpopo, oorlede in ʼn ongeluk.
“Die man het ʼn paar meter van sy motorfiets af gelê toe paramedici by die toneel opgedaag het,” het Chitra Bodasing, woordvoerder van ER24, in ʼn verklaring gesê. “Hy het verskeie beserings opgedoen. Paramedici kon ongelukkig niks vir hom doen nie.” Hy is op die toneel dood verklaar.
Die motorfiets en ʼn motor het mekaar getref. Die motoris is vir geringe beserings behandel en na ʼn hospitaal geneem vir verdere behandeling.
“Die oorsaak van die ongeluk is nog nie bekend nie. Owerhede stel ondersoek in,” het sy gesê.