Argieffoto
ʼn 30-jarige man van Polokwane in Limpopo is dood nadat hy en sy vrou vroeg Dinsdagoggend in hul huis oorval en beroof is.
Kapt. Ntobeng Phala, woordvoerder van die Polokwane-polisie, het aan Maroela Media gesê dat een verdagte omstreeks 03:00 by die egpaar se huis in ’n veiligheidskompleks in Serala View ingebreek het. Hy is deur die egpaar gekonfronteer en ʼn rusie het tussen die man en verdagte ontstaan.
Die slagoffer is verskeie kere met ʼn skerp voorwerp, vermoedelik ʼn mes, gesteek. Hy is op die toneel dood. Die vrou, wat ook met die wapen gesteek is, het geskree en die bure het onraad gemerk. Die verdagte het op die vlug geslaan en ’n televisie en sak vol ander items wat hy bymekaargemaak het, agtergelaat. Die vrou is na ʼn nabygeleë hospitaal gehaas vir behandeling.
Die vrou se vriendin, wat Maandagaand by die egpaar oornag het, is ongedeerd.
Volgens Phala word ʼn saak van huisroof en moord ondersoek.
Die name van die egpaar is aan Maroela Media bekend, maar word vir eers weerhou totdat al die familie in kennis gestel is.
In die verlede het rowers net ingebreek en op die vlug geslaan, maar dit lyk my deesdae is moord vir hulle “die cherry op die koek”!!!