Moenie hulle moer nie, asseblief

Drie dae… dis hoe lank ons nog moet wag vir die grootste sportgebeurtenis van 2011. Dit is die dag wanneer die All Blacks die openingswedstryd teen Tonga sal speel.

Dit is goed en wel om ʼn buurman te kies vir dié groot geleentheid, maar dat dít nou die nodige teenstand sal bied is beslis nie waar nie. Samoa sou beter teenstand bied. Nou-ja, hulle wil dalk 100% seker maak dat hulle die eerste wedstryd oortuigend wen!

Dit sal dalk die twyfelende gemoedere van die All Blacks ietwat gemoedsrus gee.

Dit was juis in die verlede die All Blacks se probleem dat hulle in die eerste fase maklike wedstryde gehad het. Telkens wanneer hulle teen die eerste werklike opposisie van ʼn erkende rugbykrag te staan kom, het hulle gevou. Dit sal interessant wees om te sien wat die jaar gaan gebeur. Nieu-Seeland het baie om te bewys.

Dis nou reeds ou nuus, maar die Bokke speel in groep D saam met Wallis, Samoa, Fidji en Namibië

Lande soos Kanada Japan, Roemenië, Georgië en Namibië behoort in ʼn B-liga Wêreldbeker te speel. Hulle het nie eers ʼn kans teen die top-drie Curriebeker-spanne nie – miskien teen die Bulls – maar beslis geen kans in die Wêreldbeker nie.

Wat die Curriebeker betref het die WP gelukkig oor die bomskok van ʼn eerste 15-minute Griekwa-Blitzkrieg gekom en redelik gemaklik die oorwinning behaal. Die res is volgens die stand van die Curriebeker afgehandel, met net die Bulls wat teleurstellend voortploeter en hopelik die valbyl van relegasie sal vryspring. Die uwe sal maar wag en kyk wat gebeur.

‘k Hoop nie die Springbokke neem ons minister van sport te letterlik op toe hy hulle onder dawerende gejuig afgesien het met: “moer hulle” nie. Om in die Wêreldbeker met ʼn rooikaart of twee teen die grotes te speel is nie aan te beveel nie.

Rugbygroete tot volgende keer

Bloubul

Hierdie meningstuk is deur ʼn onafhanklike persoon opgestel. Die menings en standpunte wat in hierdie skrywe uitgespreek word, is nie noodwendig die beleid of standpunt van Maroela Media se redakteurs, direksie of aandeelhouers nie. -Red

Polla Roux

Meer oor die skrywer: Polla Roux

Polla Roux is 'n oud-Westransvaler. Na draaie in die onderwys en korporatiewe wêreld, het hy vroeër vanjaar as Organisasiesekretaris by Solidariteit uitgetree.Hy het net meer as honderd Carlton-wedstryde agter die blad (1966-1976), het vir Noord-Transvaal gespeel en is na Springbokproewe genooi, maar sy loopbaan is deur 'n skouerbesering kortgeknip. Hy het gereeld as eerste liga-skeidsregter opgetree en was vanaf 1995 tot 1998 senior bestuurder by die Noordtransvaalse Rugby-unie en betrokke by die skep van die Bloubul-lied saam met Steve Hofmeyr.

Deel van: Meningsvormers

2 Kommentare

Anoniem ·

Goed gesê. Rugby gaan nie oor hoe hard jy iemand kan “moer” nie. As iemand dit wil sien, gaan kyk ‘n boksgeveg!

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.