Gedagte vir die dag: Bereid om te getuig

vrou_uitgestrekte-arms_stiltetyd_pixabay.jpg

Foto: pixabay.com

As julle sou ly omdat julle doen wat reg is, moet julle dit as ’n voorreg beskou. Wees altyd gereed om ’n antwoord te gee aan elkeen wat van julle ’n verduideliking eis oor die hoop wat in julle lewe. (1 Petrus 3:14-15)

Christene behoort bereid te wees om voort te gaan om goed te doen, ook al sou dit vir hulle swaarkry beteken. Hulle moet voorts bereid wees om te getuig oor hulle geloof. Petrus omskryf dit pragtig as “die hoop wat in julle lewe”. Oor hierdie hoop mag hulle nie stilbly nie.

As mense met jou gaaf is, is dit maklik om vriendelik met hulle te wees. Maar Christene behoort ’n stappie verder te gaan; selfs wanneer hulle sleg behandel word, moet hulle steeds vriendelik bly. Wanneer dit gebeur, sal ander mense wonder hoe jy dit regkry. Dit is dan dat jy hulle spontaan kan vertel dat jy ’n Christen is en dat Jesus die Heer van jou lewe is. Bly net nederig in die proses en lig ander in oor die hoop wat in jou hart leef.

Here Jesus, vergewe my dat ek so maklik opstandig raak as mense my te na kom. Maak my nederig en bereid om oor my geloof te getuig. Amen.

Bron:
Geskenk van genade deur Nina Smit
Uitgewer: Christelike Uitgewersmaatskappy

2 Kommentare

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.