Die Koning sal vir hulle antwoord: “Ek verseker julle: As julle iets hiervan vir een van my broers of susters gedoen het, selfs al was dit vir die heel eenvoudigste onder hulle, het julle dit vir Mý gedoen.” (Matteus 25:40)
As ek na sommige artikels, debatte en briewe in koerante kyk, is geloof vir baie mense iets wat slegs in hulle kop gebeur. Hulle stry en stoei gedurig oor kopfeite. Is hierdie siening van doop, geloof of seksualiteit reg, of is dit daardie een?
Sulke vrae is ook belangrik, maar ons moenie teologiese gesprekke onder die tafel invee asof kennis en deurdagte debatte nie saak maak nie. Enige geloofsposisie moet immers die toets van gesprekvoering kan deurstaan. Maar ons het nie ver genoeg gevorder as ons net verbale rekenskap van ons geloof afgelê het nie. Ortodoksie – die regte geloofsinhoude – vra altyd om ortopraksie – die regte geloofslewe. Vir Jesus is die toets nie net of ons reg geglo het nie, maar of ons reg voor God en tussen ander mense geleef het. Op die laaste dag sal die vraag wees of armes, vreemdelinge, hongeres, eensames en verlorenes onder ons vriende getel het. En of ons hulle gehelp het.
Bron:
Op God se genadepad deur Stephan Joubert
Uitgewer: Christelike Uitgewersmaatskappy
Dankie vir dié dagstukkie alles is só waar.