Drie mense doodgeskiet tydens onwettige staking

Drie mense is Woensdag doodgeskiet en 15 beseer tydens ʼn onwettige staking buite ʼn myn in Boitekong, buite Rustenburg, in Noordwes.

Brig. Thulani Ngubane, ʼn polisiewoordvoerder, sê sowat 250 mynwerkers, wat reeds vir die afgelope twee weke aan ʼn onwettige staking deelneem, het Woensdagmiddag buite die K5 Khwezi-myn bymekaargekom. “Die stakers en veiligheidwagte het slaags geraak. Skote is afgevuur en drie mense is dood en 15 beseer.” Hy sê die situasie het intussen na normaal teruggekeer en die polisie monitor die gebied. Geen verdere besonderhede was onmiddellik beskikbaar nie.