Kylie Hatton, die UK se adjunkdirekteur van kommunikasie en bemarking, het aan Maroela Media gesê die brand het in een van die kamers van die Leo Marquard-koshuis ontstaan. Hatton kon nie bewerings dat die brand deur ʼn verwarmer veroorsaak is, bevestig nie en het gesê die oorsaak van die brand word nog ondersoek.
“Een van die studente is in die hospitaal opgeneem weens rookinaseming,” het Hatton gesê. “Die student se ouers is in kennis gestel en UK-personeel staan die gesin in die verband by.”
Sy het gesê van die studente sal elders gehuisves word terwyl die herstelwerk in die koshuis so spoedig moontlik afgehandel word. Dit is nie in die stadium duidelik wat die omvang van die skade is nie, maar Hatton het gesê dit was ʼn “klein brand”.
Sy het bygevoeg dat berading beskikbaar sal wees vir die studente wat geraak is.