[Video] Olifant dood ná storm in Kruger

Foto: Facebook via Latest Sightings – Kruger

Die karkas van ʼn olifant, wat vermoedelik deur weerlig doodgeslaan is, is Dinsdagoggend naby die Satara-ruskamp in die Krugerwildtuin gevind.

Besoekers het glo op die karkas afgekom waar dit in die middel van die pad gelê het. ʼn Foto van die karkas is deur Kruger Latest Sightings op sosiale media gepubliseer en het tot baie bespiegeling gelei oor wat die olifant se dood kon veroorsaak het, aangesien daar geen sigbare tekens is dat die olifant deur ʼn roofdier aangeval of gevreet is nie.

Sommige sosialemediagebruikers het bespiegel of die olifant dalk deur stropers geteiken is, terwyl ander gewonder het of ʼn voertuig die dier raakgery het.

Reynold “Rey” Thakhuli, woordvoerder van SanParke, het aan Maroela Media bevestig daar word vermoed dat die olifant deur weerlig getref is, aangesien daar Maandagaand ʼn hewige storm in die gebied was. “Die dier is ondersoek en daar is geen klinkklare bewyse vir enige ander oorsaak wat tot die olifant se dood kon gelei het nie,” het Thakhuli gesê.

Hy het gesê die olifant se tande is verwyder, geregistreer en deur die SanParke-bestuur gestoor. Die karkas van die olifant is vroeër vandag verwyder.

5 Kommentare

Somer maar net ·

Dis nie so moeilik om uit te ken of die reus doodgeslaan is nie as roofdiere hom nie wil eet nie. Selde met beeste!

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.