Ma sterf ná hospitaalbesoek aan vroeggebore babas

Die Evans-gesin (Foto: Youcaring.com)

ŉ Ma van ses van die Amerikaanse deelstaat Kalifornië is in ŉ motorongeluk dood enkele oomblikke nadat sy ŉ hospitaalbesoek aan haar vroeggebore tweeling gebring het.

Volgens ŉ polisieverklaring is ŉ 21-jarige vrou vandeesweek in verband met die ongeluk in hegtenis geneem. ŉ Voorlopige ondersoek dui glo daarop dat die vrou se alkoholvlak minstens drie keer hoër as die perk was toe die ongeluk op 6 Oktober plaasgevind het. Toe die verdagte onmiddellik ná die ongeluk na die hospitaal geneem is, is leë alkoholbottels ook in haar motor gevind.

Katie Evans, die slagoffer, en haar man, Jacob, woon volgens berigte al vir langer as ŉ dekade in Kalifornië. Die egpaar het vier kinders tussen die ouderdomme van twee en 12 en ook die pasgebore tweeling.

Katie Evans saam met haar tweeling (Foto: Youcaring.com)

Natalie Mortensen, ŉ vriendin van die oorledene, het onlangs ŉ skarefinansieringveldtog begin om geld in te samel sodat Jacob ná die verlies van ŉ inkomste steeds vir sy gesin kan sorg.

Die veldtog het aanvanklik ŉ teiken van $100 000 (bykans R1,4 miljoen) gehad, maar meer as $300 000 is sedert die ongeluk vir die gesin ingesamel.

“Katie kon nie ŉ dag laat verbygaan sonder om vir haar tweeling in die hospitaal te gaan kuier nie. Sy was ŉ toegewyde ma, suster en vrou en sal ongelooflik baie gemis word. Jacob het aanvanklik gedink hy sal sy gesin moet ontwortel waar hulle grootgeword het in Kalifornië en nader aan sy familie trek om koste te bespaar, maar danksy mense se vrygewigheid het hy nou die moontlikheid om in Kalifornië aan te bly waar sy kinders grootgeword en reeds vriende het,” het Mortensen op ŉ webwerf vir die skarefinansieringsveldtog geskryf.

Die 21-jarige vrou is volgens die Kaliforniese polisie sedert Woensdag in polisieaanhouding. Daar is ook ŉ klag van strafbare manslag teen haar en borgtog van $200 000 (ongeveer R2,7 miljoen) is vasgestel.