Die dubbelkajuit-bloedbad is nou dieper as ooit. As ‘n motorjoernalis is dit lekker om verras te word, en die Triton was by sy bekendstelling in Januarie vir my so ‘n verrassing. Ons het nou ‘n kans gehad om die Triton beter te leer ken, en die tweede ontmoeting het vir my één ding bevestig: Ek is versot op die nuwe Mitsubishi Triton.
Toe die eerste Triton in 2007 in Suid-Afrika bekendgestel is, het ek nie veel daarvan gehou nie. Die vreemde J-line-ontwerp van die kajuit was vir my simpel en die agterste bakwerk wat so oplig agter het vreemd gelyk. Ek weet nou waarom dit so is. Met die J-line kan die agteras verder vorentoe skuif – dit maak die asafstand korter. Die bakwerk wat heel agter oplig gee vir die Triton ‘n beter vertrekhoek as ’n mens 4×4 ry. Die J-line-ontwerp laat ook die agtersitplek se rugleuning minder regop sit, ‘n groot probleem met vorige dubbelkajuitbakkies. Die nuwe Triton is meer aggressief afgewerk, en dit laat die ontwerp aantrekliker lyk as sy voorganger.
Die binneruim is ook mooi afgerond. Eenvoudig en skoon, met duursame maar goeie gehalte materiale. Die kombinasie van die uitleg en materiale laat die kajuit sommer luuks voel – ek hou daarvan. Die stuurwiel se knoppies is ook intuïtief maklik om baas te raak. Die Triton geniet klimaat- en spoedbeheer, ’n stuurkolom wat kan kantel en teleskopies verstelbaar is, ’n truratkamera en ’n elektries verstelbare bestuurdersitplek. Die klankstelsel is toegerus met Bluetooth, maar dis die enigste element van die Triton wat effe teleurstel en beter funksionaliteit kon bied.
Die Triton se ritgehalte is indrukwekkend goed en soepel vir ‘n dubbelkajuit. Die onderstel slinger ook bitter min in vergelyking met ouer dubbelkajuitbakkies. Dit is moontlik die meer soepel vering wat die geslinger absorbeer. Padhouvermoë is heeltemal goed en die neus draai maklik. Ek moes myself gereeld daaraan herinner dat die Triton ‘n groot lorrie is en nie ‘n renmotor nie.
Die Triton se nuwe MIVEC-16-klep-enjin met sy 2.4 liter-dubbelbonokas is ‘n juweel. Hy bied 133 kW en 430 Nm-wringkrag.
Hy loop regtig stil met bitter min gekletter en daar is geen turbotraagheid om van te praat nie. Die nuwe enjin is ook bitter lig op brandstof. Die beste verbruiksyfer wat ek kon behaal, is 6.7 ℓ/100 km. Vir ‘n groot dubbelkajuit is dit regtig puik. Al hoe ’n mens so ‘n lekker enjin verbeter, is as dit met ‘n goeie ratkas gepaardgaan. In die Triton se geval gaan ek uitdruklik sê: “Die outomatiese 5-spoed-ratkas in die Triton is die beste outomatiese ratkas in ‘n bakkie waarmee ek al gery het. By verre!” Sy ratverhoudings is perfek gespasieer en die ratkas sit seepglad oor. Die ratkas is ook nie oorsensitief vir versneller-insette sodat hy in die ratkas rondgryp vir ratte as jy net ’n bietjie vetgee nie. Ek moet wel nog die nuwe Navara en Amarok ry, so ek kan nie nou al kommentaar lewer op hulle ratkaste nie.
Die goeie enjin en ratkas word net verder verbeter deur Mitsubishi se Super Select II-vierwielaandrywingstelsel. Die stelsel is ook te vinde in die merkwaardige Pajero-reeks. Tydens die bekendstelling het ons ’n hindernisbaan met die Triton getrotseer en goeie ente op grondpaaie gery. Die Triton se vernuf op ‘n grondpad is ongeëwenaard.
Met ons tweede ontmoeting het ek die Triton na ons plaaslike watergat by Groenkloof Natuurreservaat geneem. Die Triton skrik vir niks. As hy bietjie vassteek by ‘n hindernis, skakel net die ewenaarslot aan en die Triton bokspring oor amper enige ding. Al wat ek aan die Triton sou verander, is die sierwiele waarmee hy uitkom. Dit is te plat voor en blink, so ek het van die wiele seergemaak by Groenkloof. Ai. Ek sien wel daar is ‘n ander wiel-opsie beskikbaar wat moontlik minder maklik sal seerkry. Om op te som is dit moeilik om nie liries te raak oor die Triton sonder dat mense dink ek word ‘n reusesalaris deur Mitsubishi betaal nie … maar ek belowe dis nie die geval nie. Ek wens! Hulle kan net vir my ‘n Triton gee. Die ontwerp gaan moontlik nie in almal se smaak val nie, maar jy doen jouself ‘n reuse-onreg aan indien jy nie die Triton oorweeg as jy tans in die mark is vir ‘n dubbelkajuit nie.
Die reeks lyk so:
Triton 2.4 Di-D 4×2 handrat | 7.1 ℓ/100 km | R479 900 |
Triton 2.4 Di-D 4×2 outo | 7.7 ℓ/100 km | R499 900 |
Triton 2.4 Di-D 4×4 handrat | 7.3 ℓ/100 km | R539 900 |
Triton 2.4 Di-D 4×4 outo | 7.8 ℓ/100 km | R559 900 |
Die reeks word gedek deur ‘n 3 jaar/100 000 km-waarborg en 5 jaar/90 000 km-diensplan. Die Dienstussenposes is elke 10 000 km.
Die kompetisie lyk so:
Isuzu KB300D-Teg 4×4 LX outo | 130 kW/ 380 Nm | 7.9 ℓ/100 km | 5 jaar/120 000 km-waarborg 5 jaar/ 90 000 km-diensplan | R563 500 |
Toyota Hilux 2.8GD-6 4×4 Raider outo | 130 kW/ 450Nm | 8.5 ℓ/100 km | 3 jaar/100 000 km- waarborg 5 jaar/90 000 km-diensplan | R573 500 |
Nissan Navara 2.3 4×4 LE outo | 140 kW/ 450Nm | 7 ℓ/100km | 6 jaar/150 000 km-waarborg 3 jaar/90 000 km-diensplan | R584 900 |
Volkswagen Amarok 2.0BiTDI Highline 4Motion Outo | 132 kW/ 420Nm | 8.3 ℓ/100km | 3 jaar/100 000 km-waarborg 5 jaar/90 000 km-diensplan | R587 400 |
Ford Ranger 3.2 4×4 XLT outo | 147 kW/ 470Nm | 9 ℓ/100km | 4 jaar/120 000 km-waarborg 5 jaar/100 000km-diensplan | R593 900 |
In die klas is die pryse nie wydverspreid nie. Daar is ‘n paar opsies en almal gaan van mening verskil. Gaan toetsbestuur elkeen en kies die een waarvan jy hou. Ek hou bitter baie van die Triton. Hy is ook nie naastenby so gewild soos Ranger of Hilux nie, so sy risiko vir diefstal en kaping is aansienlik minder.
‘n Baie goeie produk en artikel Brendan. Hartseer dat kaping en diefstalrisiko ‘n geldige oorweging is in die “ruwe Suid Afrika”… Geseende Paasfees vir almal.