[Foto’s] Brittanje se kleinste kasteel te koop

(Foto: Savills)

Dit is nou jou kans om daardie sprokieskasteel te koop waarvan jy nog altyd droom.

In Warwickshire, Engeland, is ʼn kasteeltjie te koop wat bekendstaan as Molly’s Lodge. Dit dateer uit 1834. Dit is deur Edward Blore gebou wat verantwoordelik was vir uitbreidings aan Buckingham-paleis in die 1850’s.

Die kasteel het net een slaapkamer, ʼn badkamer, ʼn sitkamer en ʼn uitsonderlike stel trappe. Daar is ʼn bykomende woonstel langs die kasteel met ʼn slaapkamer, ʼn kombuis en ʼn motorhuis. Dit alles word teen £550 000 verkoop.

Iain Powis, die eiendomsagent van Savills wat die kasteel verkoop, sê dit is ʼn unieke eiendom. “Daar is nie regtig baie van sy soort beskikbaar nie. Dit is iets heeltemal anders as die ander fraai huise in die omgewing.”

Dit is naby die klein dorpie Long Compton waar daar omtrent net ʼn poskantoor, ʼn paar winkels, ʼn kerk, hotel en skool is.