As jy in Suid-Afrika se politiek bo wil bly, het jy geld nodig. Dink jy mense stem omdat hulle in die kandidaat se visie glo? Nee, ou maat, die wet van Gauteng is ketjieng-ketjieng-ketjieng.
Kaptein Cindie McKelly, ʼn forensiese spesialis van die Randfontein-polisiestasie, word een oggend in Februarie na ʼn misdaadtoneel in Kagiso ontbied. Daar vind sy die oorskot van drie slagoffers in ʼn verwaarloosde klinkersteenhuis: Twee Somaliese vroue en een Suid-Afrikaner – laasgenoemde met ʼn koeëlronde gat waar sy linkeroog behoort te wees.
Vroeg April ontvang Cindie ʼn oproep van kaptein Awande Mhlanga, speurder in Parktown, oor drie moorde wat blykbaar ooreenstem met haar eie ondersoek. En ʼn paar dae later vind hulle nóg ʼn slagoffer met dieselfde modus operandi, in Muldersdrift.
ʼn Taakmag word saamgestel om die Oogarts, soos die media na die skerpskutter verwys, vas te trek. Ten spyte van ʼn onbekwame brigadier en ewig krimpende begrotings begin Cindie en Awande geleidelik ʼn komplekse netwerk ontrafel wat staatskaping laat lyk na swieties steel by die hoekkafee.
Die wet van Gauteng, Hannes Barnard se debuutspanningsroman, het ʼn verweefde, eg Suid-Afrikaanse intrige: politieke faksiegevegte, aartskorrupsie én geldwassery.
Oor die skrywer
Barnard is op 24 Augustus 1976 in Sasolburg gebore en matrikuleer aan die Hoërskool Dundee in KZN. Sy debuutroman, Halley se komeet, verskyn in 2019 by Wenkbrou, ʼn druknaam van Lapa Uitgewers. Sy jeugroman, Wolk, verskyn in 2020 ook by Lapa, gevolg deur Roet in 2021. Barnard woon tans in Johannesburg en werk in verkope en bemarking.
Prys: R310,00*
*Prys onderworpe aan verandering
Koop die boek by Graffiti Boeke
Is dit ń Taakmag of ń Taakspan ?