Hettie Brittz
Kweek kinders met heel harte is ’n praktiese gids om jou kind reg groot te kry in vandag se tye – na siel en gees. Ouerskapkenner Hettie Brittz kyk indringend na kwessies soos die versorging van jou kind se liggaam, siel en gees, selfbeeldontwikkeling, die kweking van goeie karakter, die afleer van slegte gewoontes en die hantering van swak karaktereienskappe.
Ouers staan vandag, met die werklikheid van sosiale media en die internet, voor groter uitdagings as ooit. Hettie verduidelik hoe ons, terwyl ons ons kinders beskerm teen die dinge waarvoor hulle nog nie gereed is nie, hulle ook weerbaar kan maak teen seerkry en gevare. Met liefde en begrip kan ons ons kinders se selfbeeld, emosionele intelligensie en goeie karakter help bou. Kweek kinders met heel harte is ’n praktiese en inspirerende gids vir dié groot taak.
Oor die outeur:
Hettie Brittz is ’n bekende in ouerskapkringe. Sy skryf wyd oor ouerskap, kinders en gesinsverhoudings. Sy het bekendheid verwerf vir haar boomsoortprofiele. Sy is getroud met die gospelsanger Louis Brittz.