Boek: ‘’n Pampoen vir Kersfees’ – oor reise, stede en buitelandse ervarings

Hennie van Coller

’n Pampoen vir Kersfees is ’n versameling van die rubrieke wat Hennie van Coller die afgelope 20 jaar vir Volksblad skryf.

Die aanvanklike opdrag aan hom as rubriekskrywer was om ’n aantal stukke oor sy Nederlandse verblyf te skryf. Baie van hierdie gekose rubrieke handel daarom oor reise, stede en buitelandse ervarings. As akademikus, pryswenner-kok én wynmaker skryf hy gevolglik ook graag oor die letterkunde, kos en wyn.

Die rubriek is ’n meerkantige sub-genre wat soms na aan die essay beweeg en soms weer oorhel na die rasegte (kort) kortverhaal soos duidelik geïllustreer in hierdie versameling. In die tipiese rubriek is die skrywer daarvan (as gefiksionaliseerde “ek”) nog duideliker aanwesig as in enige ander persoonlike skryfwerk: Sý voor- en afkeure, sý belangstellings en sý hebbelikhede staan voorop. Dit word gerelativeer deur selfspot, satire, ironie en humor; elemente wat almal skering en inslag vorm in Van Coller se rubrieke.

’n Pampoen vir Kersfees is ’n eerlike en soms onthutsende besinning oor dit waaroor ons dink en waarbinne ons leef. Dit is leesstof vir elke betrokke leser wat ingelig wil wees en omgee vir ’n kollektiewe samespraak oor die mens, die land en die periferie daarvan.

Oor die skrywer

Hennie van Coller is buitengewone professor by die NWU en uitstaande professor (emeritus) van die UV. Hy was voorsitter van die Suid-Afrikaanse Akademie vir Wetenskap en Kuns, skrywer en redakteur van byna 30 boeke. Van Coller het ook meer as 140 wetenskaplike artikels geskryf en nog ʼn veertigtal akademiese bydraes in boeke gelewer. Hy het talle pryse en toekennings, onder meer die Gustav Prellerprys vir literatuurwetenskap en literêre kritiek en die DF Malanprys vir uitstaande bydraes in Afrikaans, ontvang. Van sy kortverhale is in versamelbundels opgeneem, onder meer in Die bruid en ander verhale, en sy eerste digbundel Soom het in 2012 verskyn. Van Coller het ook gedigte van Luuk Gruwez (Bandelose gedigte, 2009) en Suiker van Hugo Claus (2017) vertaal.

Prys: R240,00*
*Prys onderworpe aan verandering
Koop die e-boek by Naledi

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae