Boek: ‘Sterre vir die donker’: Oor meisies en grootword-probleme

Noreen Nolte

Dit is aaklig om op amper sewentien so baie dinge nie te weet nie.

Nie te weet of jou ma dalk reg is en jy net ’n pil moet drink om die donkerte te keer nie, nie te weet of jou broer se ambisie hom die kluts gaan laat kwyt raak nie. Om nie eers te praat oor die feit dat jy glad nie te weet wat jy met die res van jou vreeslike gemiddelde lewe wil doen nie.

En die een persoon wat alles sou verstaan het, is vir altyd weg.

Gelukkig bring die nuwe jaar ’n paar veranderinge wat Helena so ’n bietjie ligter laat voel. Haar viool begin weer sing, en sy besluit om self antwoorde te begin soek. Ongelukkig is ’n antwoord egter nie altyd goeie nuus nie…

Hoe kón sy Luca met die duifgrys oë se gesels, sy hand om hare, so heeltemal verkeerd verstaan het? Kan een dom-onnosele besluit se gevolge regtig so ver uitkring dat dit iemand se toekoms sal vernietig? Ergste nog, wat presies moet sy met al hierdie antwoorde doen? Helena begin dink dat om nie te weet nie, dalk tóg beter is.

Skielik klink weghardloop na ’n goeie plan… maar is dit?

In Sterre vir die donker worstel die hoofkarakter, ’n normale meisie, met allerlei grootword-probleme, soos die dood van ’n geliefde, groepsdruk en haar eerste liefde.

Oor die skrywer

Noreen Nolte bly in die Boland saam met haar gesin. Haar liefde vir woorde kom al van haar kinderdae in ’n huis vol boeke af. Sy het in 1995 in Somerset-Wes gematrikuleer en in 2002 haar meestersgraad in voedselwetenskap aan die

Universiteit Stellenbosch behaal. Nolte het vir ’n paar jaar in die voedselbedryf gewerk, van die Noord-Kaap tot in Gauteng. Hier het sy ’n jare lange liefde vir ballet vol sirkel getrek deur as balletonderwyseres te kwalifiseer. Haar gesin was vir ’n paar jaar haar primêre fokus; maar toe sy opnuut die lekkerte van boeke saam met haar kinders ontdek, het dit ’n lus vir skryf in haar wakker gemaak.

Prys: R190,00*
*Prys onderworpe aan verandering
Koop die boek by Lapa Uitgewers

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae