Theresa van Baalen
Die lang reis na die planeet Zenkion is uiteindelik verby, maar vir Mitch Wilson is dit ʼn antiklimaks omdat sy beste vriend, Lionel, dit nie saam met hom tot op Zenkion gemaak het nie. Min weet hy dat hy nog nie die laaste van Lionel gesien het nie. Is die beweringe waar dat die mense van Deltaville iewers op Zenkion aangehou word? Sal Mitch en Lionel dit regkry om hul gesinne weer te vind, en is Imke se Aarde-ouma ook daar?
Imke se pad kruis onverwags met die van haar pa, Drogan. Gaan hy haar probeer verhoed om saam met Mitch-hulle terug te gaan Aarde toe as alles uiteindelik verby is? Wat gaan eintlik op Zenkion aan, en hoe pas die Aardbewoners in die prentjie?
Z-A-K: Die geheime van Zenkion is ʼn wetenskapfiksie- en nabye toekomsverhaal en die laaste boek in Theresa van Baalen se ZAK-reeks. Beleef die avontuur saam met die drie vriende en vind uit hoe die laaste stukkies van die legkaart inmekaarpas.
Oor die skrywer
Van Baalen woon al vir bykans 30 jaar op Port Nolloth, maar het tydelik verhuis na Hermanus ter wille van haar jongste seun se hoërskoolloopbaan. Sy het op nege al besluit dat sy ʼn skrywer gaan word. Dit het gebeur nadat sy Enid Blyton se The Secret Seven gelees het. Sy is al met ATKV-kinderboektoekennings vereer en het die Tienie Holloway-medalje vir haar eerste prenteboek ontvang. Sy bly graag kreatief besig met kuns en handwerk.
Prys: R180,00*
*Prys onderworpe aan verandering
Koop die boek by Graffiti Boeke
