Prinses Charlene-biografie deur SA joernalis kry Franse flair

Arlene Prinsloo se boek oor prinses Charlene van Monco is nou ook in Frans beskikbaar. (Foto’s: Jonathan Ball-uitgewers en L’Archipel-uitgewers)

Toe die veteraanjoernalis Arlene Prinsloo opdrag gekry het om ʼn boek oor Haar Hoogheid prinses Charlene van Monaco te skryf, was haar doelwit eenvoudig: om dié Suid-Afrikaanse plaaskind en puik voormalige Olimpiese swemmer se verhaal op ʼn eerbare wyse neer te pen.

Nooit het dié gesoute joernalis, en selferkende koninklike fanatikus, gedink dat haar woorde eendag op internasionale boekwinkelrakke sou pronk nie, en dít boonop in die einste taal waardeur prinses Charlene nou daagliks omring word.

Charlene: In Search of a Princess, wat in 2022 deur Jonathan Ball-uitgewers in Suid-Afrika bekendgestel is, is onlangs vertaal en word nou in Frankryk as Charlène Story (Charlene se verhaal) verkoop.

Dié ongemagtigde biografie was Prinsloo se eerste boek en vertel oor Charlene se lewe en loopbaan van haar grootwordjare as ʼn plaaskind in Zimbabwe af, tot haar gesin se emigrasie na Suid-Afrika waar haar indrukwekkende swemloopbaan afgeskop het.

ʼn Groot fokuspunt is natuurlik haar ontmoeting en huwelik met prins Albert II van Monaco en die geboorte van haar skattige tweeling.

“Ek moet bieg, ek het ʼn paar traantjies gestort,” vertel Prinsloo aan Maroela Media oor haar boek se Franse vertaling.

“Dit was ʼn groot oomblik vir my gewees.”

Arlene Prinsloo. (Foto: Verskaf)

Verteenwoordigers van die Franse uitgewery, L’Archipel, het Gill Moody van Jonathan Ball tydens die Frankfurt-boekeskou in Oktober 2022 genader en gevra om die boek onder hul naam in Frankryk te publiseer.

Prinses Charlene se lewe aan die sy van Monaco se prins Albert, is al vir jare die onderwerp van bespreking, veral in die Franse media en poniepers.

Haar agt maande lange hiatus van die koninklike kollig nadat sy in Maart 2021 na Suid-Afrika gereis het vir haar bewaringswerk met renosters, het veral skindertonge laat klap oor haar huwelik en geestesgesondheid.

“Dit is ʼn verskriklike groot kompliment, nie omdat ek dit geskryf het nie, maar eintlik meer om te weet dat daar ʼn Franse uitgewer is wat bereid is om Charlene se kant van die storie te vertel,” verduidelik Prinsloo.

Philippe Delorme, ’n Franse historikus en joernalis, het ook ʼn voorwoord vir die Franse kopie geskryf. Prinsloo vertel dat sy met die skryf van haar boek toevallig van sy kommentaar oor Charlene raakgelees het.

Benewens die voorwoord spog Charlène Story ook met ʼn stylvolle nuwe voorblad, wat volgens Prinsloo “uiters sjiek en tipies Frans” is.

Sy merk egter op dat daar teenstellings is met die voorbladfoto, wat in 2013 by die Princess Grace Awards-galageleentheid in New York geneem is, en foto’s waarin die prinses deesdae verskyn.

Arlene Prinsloo se boek pronk nou op Franse boekrakke. (Foto: Verskaf)

“Sy probeer nie voorgee nie. Sy het self al in onderhoude gesê sy is deeglik bewus van die aantygings dat sy in foto’s ongelukkig lyk en nie oral glimlag nie, maar sy is nie soos die ander koninklikes wat glimlag in die publiek en all glamour is, maar in die binnehowe is dit dan ʼn ander storie nie.”

Prinsloo erken dat sy nou ná haar boek meer beskermend oor die prinses voel.

“Omdat ek self in die media werk, weet ek watse ongevraagde goed daar al oor haar geskryf is, want sy is ʼn sagte teiken. Ek is ongelooflik trots op haar, want sy kom tog van ons eie bodem af.”

Ondanks bespiegeling oor Charlene se huwelik en gesondheid, is Prinsloo van mening dat die Monagese prinses tans op die herstelpad is.

“Sy hou dit wat op haar pad gekom het gesondheidsgewys privaat. Sy lyk nie noodwendig vir my hartseer nie, ek dink sy probeer net om met tye haar emosies in toom te hou. Dit is goed dat sy ook minder openbare verskynings bywoon, en dit wil vir my voorkom dat Albert haar die ruimte bied om op haar tyd gesond te word.”

Prinsloo sê ook dat die prinses se donkerder kapsel, wat koppe onlangs tydens die 80ste Monaco-Grand Prix, laat draai het, ook simbolies is van haar nuwe lewensfase.

“Sy verander haar haarstyl as daar iets groots in haar lewe gebeur. Ek sien die nuwe haarkleur as die betreding van ʼn nuwe fase van beterskap. Ek’s gaande daaroor.”

Prinses Charlene onlangs by die Grand Prix in Monaco. (Foto: Jakub Porzycki/NurPhoto via AFP)

Dié joernalis, wat gedurende haar merkwaardige loopbaan, wat oor drie dekades strek, vir Netwerk24, Rapport, Die Burger en Beeld gewerk en ook koninklike nuus as blogger vir Sarie en Netwerk24 gedek het, se groot droom is om Charlene eendag in persoon te ontmoet.

“Ek is nie ʼn sensasionele joernalis nie, ek was nog nooit nie. My droom is om self in persoon met haar te gesels en net iets mooi oor haar te skryf. Ek wil die tipe onderhoud doen waar ʼn mens nie net die gewone vrae mag vra en die gewone antwoorde kry nie.”

Prinsloo was self ook tussen die Britse skare vir groot koninklike gebeure, onder meer prinses Diana en koningin Elizabeth II se begrafnisse, asook prins Harry en prins William se troudae.

Sy was nou onlangs in Londen om vir Netwerk24 oor koning Charles se geskiedkundige kroningsplegtigheid te berig.

Nie net kon sy die antieke goue koets en Red Arrows van die Britse lugmag in lewende lywe aanskou nie, maar ook saam met die duisende mense wat op die strate van Londen toegesak het, die Onse Vader opsê – iets wat sy as ʼn hoenderveloomblik beskryf.

“Ek is seker dat daar ʼn hele paar ateïste in die skare was, maar tog het derduisende mense saamgebid. Ek het dit boonop in Afrikaans opgesê. Veral daardie oomblik was die blase en seer knieë werd.”

  • Luister hier na Maroela Media se podsendingonderhoud met Arlene Prinsloo oor Charlene: In Search of a Princess.
  • Charlene, In Search of a Princess kos R265 (prys onderworpe aan verandering).

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.