Hier volg ʼn uittreksel uit Verkleurmannetjie deur François Bloemhof.
Ek het pas die straat oorgesteek, toe iets my dwing om oor my skouer te kyk …
Niemand lyk of hulle my eens opmerk nie.
Maar vir ʼn oomblik was ek seker iemand hou my dop.
Daai kriewelrige gevoel wat jy soms teen jou ruggraat af kry, asof die spook van ʼn wêreldbekende pianis begin het om sy akkoorde daar te oefen.
Ek kyk weer ingeval dit hy is: die prokureur; meneer Du Toit; Pa. Miskien het hy agter my aan gekom omdat hy nog iets wou sê.
Daar’s niks.
Net dorpsmense.
Wys jou net in watter toestand wás ek!
Ek stap aan. Die kriewelrige gevoel kom jou wragtag weer, maar nou weet ek niemand kyk na my nie. Ek is op ʼn vreemde dorp en het pas iets hanteer waarop niks my kon voorberei nie, so dis oukei om gerattle te wees.
Twee blokke verder is ek terug by die lang dubbelverdieping waar ek gisteraand ingeboek het – ek wou nie vanoggend eers hier aankom nie. Dit was seker laaities wat die groot plastiekbord met klippe bygekom het.
STE NSDRIF HOT L
Die kamerdeur is skaars toe agter my, of ek bel vir Adri.
Wat dadelik antwoord: “Hoe’t dit gegaan?”
“Goed. Hy’s baie vriendelik.” Ek skop my skoene uit en sit eers die foon op die valerige tafeltjie neer sodat ek die hemp nog so toegeknoop oor my kop kan trek. Ek wat omtrent nooit ʼn knoophemp dra nie. Dis benoud in die kamer en ek kan weer myself wees.
“Lyk julle na mekaar?” vra Adri.
Ek vang my bolyf in die lang, dowwe spieël. Skraal maar met spiere op die regte plekke. Dit kos reg eet en oefen om te lyk asof alles vanself gekom het.
“Dis snaaks, maar ja. Ek het nie gedink ons sou nie.”
“Hoekom is dit vir jou snaaks? Ek lyk dan soos Pa. Too bad, met dié neus!”
“Daar’s niks fout met jou neus nie.”
“Wat ʼn hele klomp cosmetic procedures nie kan regruk nie.”
“Ag, Adri.”
“Ag, Marco,” na-aap sy my.
***
Verkleurmannetjie het pas by Lapa Uitgewers verskyn en dit kos R200 (prys onderworpe aan verandering). Klik hier om meer oor die boek te wete te kom.
Louis Awerbuck het met François Bloemhof oor sy jeugverhaal gesels. Luister hier na die volledige gesprek wat deur Graffiti Boeke aangebied is:
- Graffiti Boeke se aanlyn kuiers en boekbekendstellings word weekliks op Facebook
- Die uittreksel is goedgunstig deur Lapa Uitgewers, ʼn druknaam van Penguin Random House, verskaf.