Argieffoto
George Weideman (1947 – 2008)
Met die ouerword meet jy jouself
soms aan ʼn voorsaat: jy wil weet
oor Grootjie met sy Kaspaasbaard:
Hoe het hy gesoen? Hoe’t hy pap geëet?
Ouma Baai is bokke toe terwyl
die sterre nog suikerblink
in die hemelkom lê. Oor haar
boermeelpap kom bokmelk en heuning.
Ma het, sekerlik onwys, klonte
vet of kaiings by ons pap geroer;
self het sy die aanbrandsel –
donker en bitter soos koffiemoer –
met smaak geëet. En jy, jou baard
gefatsoeneer, eet dun snytjies roosterbrood
of kitspap met afgeroomde melk,
soen jou vrou en gaan ook dood.
