Gedig: Al sou

Argieffoto

Argieffoto

George Weideman (1947 – 2008)

Ek sal jou liefhê heel my lewe lank
selfs al sou die t’nouroevygie
in droë jare skaarser rank

al sou die sleepmis vroeg insleep
van die see af en die wilde-anys
toe-oog bly en die son vergeefs
ander wang vir die wêreld wys

al sou die ooswind knaend waai
en om ons net blylêgoed bly lê
net knapveld waar daar opslag was
en ons vergeefs grawe aan ʼn gorê

al sou ons sleepvoet en doekvoet loop
hande krom soos haakdoringbos
al het die wind die gousblom gestroop

al het die jare ons uitoorlê
sal ek jou heel my lewe lank bly liefhê

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

3 Kommentare

Su-an (Muller) Marais ·

Hierdie was my troubelofte aan my man in die klipkerk… langs die Vaalrivier… terwyl die Nguni-beeste in die soet gras van Vredefortkoepel wei… #heimwee #beautiful

Eliza-beth ·

O Su-an… dis wonderlik dit klink of jy ‘n fantastiese troue gehad het! Hoe mooi en romanties! Mag jul liefde bly blom!

Diane Erasmus ·

Ja nee die liefde is n wonderlike ervaring wat van God af kom

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.