RK Belcher (1933 – 2006)
Ma is dood
onder ʼn trein.
Ons leef van brood
en Pa van wyn.
Hoit gamat, kappit, kappit eit
want môre is jy alles kwyt.
Spoeg in die lug en sing jong, sing
want die lewe is ʼn bitter ding.
Goergie, Peorgie, pudding and pie –
hoe sê jy ek het God verraai?
Ou klong, you sommer make me cry.
Hoes daai?
Mary had
a little lamb,
its feets was white
like snow.
Hul het hom toe
mos vasgenael,
en kyk
hoe lyk
hy
nou.