Gedig: Foto van ma

Argieffoto Foto; Pinterest

Argieffoto Foto; Pinterest

Marlise Joubert (Geb. 1945)

(vir Pierre en Marcelle)

sonder meer sonder meer staan sy daar
met min of meer die bossie blomme
helderpienk en geel geruiker
die vinger opnuut gering

sonder meer staan sy daar
julle ma
teen die muur van groenverspoelde verf
op die foto meer na turkoois ingevlam
en ja, sy lag

want sy weet niks maak meer saak
met min of meer in die middeljare nie
as die goue band sou kraak
sal die vinger immer die jare
se bladsye frommel vir verder lees
as sy wel haar kyk laastens verruil
vir die wintergrys van sterflikheid
dan is daar mos ʼn huis sonder meer
om in te bly met geen verband
ʼn huis met botter
en met brood in die blik

sonder meer staan sy daar
julle ma
gereed vir die laaste tog
op die vlerkvlug van ʼn nuwe minnaar
en as die reis alle blomme verloor
wat maak dit saak

want ma het immers vir julle ook
in hierdie haard
haar liefde in elke blik
nagelaat

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Het jy iets op die hart? Maroela Media se kommentaarfunksie is ongelukkig gesluit oor die Paasnaweek. Kom kuier gerus later weer!

Nuuswenke kan deur hierdie vorm gestuur word.