Ingrid Jonker (1933 – 1965)
Vir Jack
Jou wat ek met ʼn potlood teken
soos ʼn mens se geheim
ʼn brief ʼn telefoonnommer
Jou wat ek met ʼn potlood teken
soos ʼn kind ʼn naak mannetjie
onder sy lessenaar op skool
Jou wat ek met ʼn potlood teken
ʼn woord ʼn naam ʼn stemval
het ek deurreis soos bloed
familiekringe wetgewinge slagvelde
soos die verlatenheid die oë
van die wêreld
Jou wat ek met ʼn potlood teken
enkele lyne bewend onseker
geheim anderkant die geheim van are
geheim anderkant die liefde
Uit: Ingrid Jonker, Versamelde Werke