Gedig: Uit: Die passie van ons Heer

kruise_son_stiltetyd_pixabay.jpg

Argieffoto (Foto: Pixabay)

WEG Louw (1913 – 1980)

Avondmaal
Daar was ʼn stilte in die oppersaal
toe Hy met sterk, verhewe hand Hom draai
en sê: “Die man wat My vannag verraai,
sit saam met My aan hierdie avondmaal…”

In twyfel het hul daardie woord herhaal
en wis nie dat hul vóór die hanekraai
soos blare van ʼn boom van Hom sou waai…
Maar één was doodsbleek teen die lampestraal!

Toe het Hy die brood geneem en God gedank,
dit met die hand gebreek en dit geseën:
die beker het Hy boordevol gegooi

met wyn wat dartel was en vonkelrooi –
maar, hoog gehou, was in geen hand voorheen
ooit wyn so rooi, ooit aardse brood so blank!

Golgota
Met rooi, gewonde voete en die pyn
van dorings wat sy hoof in spot omsluit,
het Hy – gelaaf met mirre en bitter wyn –
teen Golgota sy droewe gang gestuit.

Soldate het sy klere uitgetrek
en luid getwis oor kleed en lendedoek;
sy naakte liggaam het hul oopgevlek
oor stam en balk en dit met smaad vervloek.

Die wrede spykers word deur vlees en been
met felle slae ingejaag: sy hande,
verstrak in laaste, goddelike seën,
het Hy wyd uitgebreik oor álle lande…

Die vroue roep in duisternis en treur
Die aarde beef… Die tempelvoorhang skeur.

Opstanding
Drie dae was daar duisternis… Alleen,
in diep gelatenheid, soos in die sand
ʼn suiwer saad wat wag op son en eën
het al sy sterflikheid stil weggebrand:

die swaar en trae slakke van die vlees,
sy onrus, vrees, verwarringe en waan,
dat Hy, één met die Vader en die Gees,
verheerlik in die lig weer op kan staan.

Die wagte kon in daardie gloed nie kyk.
Die steen is afgewentel deur ʼn wind
wat uit vier hemelstreke op die aarde stryk
dat dit vergruisel is tot stof en grint,

en soos uit diepe duisternis ʼn vlam,
staan hoog en rank en smetteloos die Lam!

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

1 Kommentaar

jongste oudste gewildste
FM

Daardie geheimenis binne die graf
Oorwinning vir ewig en ewig
Hoe lank dit ook al duur
1000 jaar is soos eendag
Die tyd verwar ons kort gedagte
Al wat werklik saak maak
My daaglikse verhouding met ons HEER

Lieflike gedig van W E G Louw