Foto ter illustrasie. (Foto: Pixabay)
AG Visser (1878 – 1929)
Uit: Noag se ark
Met die welsprekendheid van iemand wat ʼn sweep in sy hand het en ʼn pluiskeil so effens skuins agteroor gestoor
2. Die renoster
Die droster met sy vaal karos,
Daar by die wag-ʼn-bietjie-bos,
Met die dik opnaaisels in sy huid
Met ʼn tandestoker op sy snuit –
Dit is mos
die Agteros-
sambok-
renosteros.
3. Die dromedaris
Die harige ou harlekyn,
Die Fordkar van die sandwoestyn,
Met ʼn rolvat water in sy inventaris,
Wat nog altyd silwerskoon en klaar is,
Is die
Kalaharie-
Sarie-
harie-
blikkanarie-
drome-
daris.
6. Ensovoorts
Daar’s nog goed met wreder name:
Kwaggas uit die Kraggakame,
Piering-pinang-rottang-blatjang-oerangoetangs,
Middellandse-see-se-ruben-simeon-leviatangs.
Kom jul môre oor ʼn week weer, dan miskien
Sal al die arkebroeders jul vir hul en hul vir julle sien.
