Gedig: Uit: Noag se ark

(Grafika: Musa Köse/Pixabay)

Uit: Noag se ark
AG Visser (1878 – 1929)

Met die welsprekendheid van iemand wat ʼn sweep in sy hand het en ʼn pluiskeil so effens skuins agteroor gestoor

  1. Die renoster

Die droster met sy vaal karos,
Daar by die wag-ʼn-bietjie-bos,
Met die dik opnaaisels in sy huid
Met ʼn tandestoker op sy snuit –
Dit is mos
die Agteros-
sambok-
renosteros.

  1. Die dromedaris

Die harige ou harlekyn,
Die Fordkar van die sandwoestyn,
Met ʼn rolvat water in sy inventaris,
Wat nog altyhd silwerskoon en klaar is,
Is die
Kalaharie-
Sarie-
harie-
blikkanarie-
drome-
daris.

  1. Ensovoorts

Daar’s nog goed met wreder name:
Kwaggas uit die Kraggakame,
Piering-pinang-rottang-blatjang-oerangoetangs,
Middellandse-see-se-ruben-simeon-leviatangs.
Kom jul môre oor ʼn week weer, dan miskien
Sal al die arkebroeders jul vir hul en hul vir julle sien.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

Een kommentaar

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.