Argieffoto (Foto: Tú Anh/Pixabay)
Joan Hambidge (Geb. 1956)
Dit is nie die liggaam nie, nee –
want liefde is meer as lyf.
Dit is nie die oë nie, nee –
want liefde is meer as sien.
Dit is nie die hande nie, nee –
want liefde is meer as voel.
Nog minder die herinneringe –
dit is alles pynlik, verlore.
Met jou voel ek ʼn naelstring,
ʼn ondeurdringbare vlegsel,
vasgeknoop, vasgeheg, vasgebind.
Tot die dood ons saambring.
Huilmooi.