Argieffoto
JC Steyn (Geb. 1938)
Woorde is almal sʼn,
nie net myne nie;
daar’s geen heimlike opsie nie,
‘k was te laat vir mineraleregte.
Maar delwe kan ons tog almal
dwarsdeur ons hele lewe deur;
buitendien en boonop
vir kleims is gehardloop
en vergange vir goud
ʼn kryg laat ontbrand.
Al wat myne is
is my sinne;
in sinne is alle woorde
mýne
waar ek my in kan verdiep
verborge gange oopgrawe
met geheimsinnige waters deursypel
om myne te verbind met ander ryk domeine s’nne.
