Luister: Gedig: Stilte

Klik op die prentjie onderaan die gedig om daarna te luister

Klik op die prentjie onderaan die gedig om daarna te luister

Hunter Kennedy (Die Heuwels Fantasties)

Grense is lyne op padkaarte en breine
mense is gedagtes met gesigsuitdrukkings
jou taal is klanke wat jou vriende maak

Waar jy groot geword het bestaan nie meer nie
verlore kinders moet loop en leer en werk om van verlede en ontdekkingslus
te bekeer

grense verdedig hart en land
maar hart is hart
en
land is land
en
Afrikaans is Afrikaans
maak nie saak waar in die wêreld jy jouself bevind nie

orals op die verkeerde paaie
ry duur motors
met moë gesigte
onderdeur bang lamppale
wat op frustreerde doodloopstrate skyn

met hartseer bankkaarte
wat by leë banktellers na genade vry

en deurmekaar selfone wat langdradig kopsere wakker lui

lewe ons verby sinister advertensieborde
en senutergende koerantopskrifte
en mekaar

oral
verveelde TV’s
wat hartseer bangmaak-beelde flikker
op oorgewig sitkamerstelle
bou ons verleë aan hoop

om eendag hier iewers
’n prentjiemooi huis by die bank te kan koop

in die druk verkeer
en die briesende wind
wat die diepseewolke se moordneigende reën
oor die kense skiereiland se versadigde lokasies spoeg

besef ek dat ons net sotte in ’n resies is
wat versot verby mekaar spronge tree
Ons is maar pens en pootjies
en ons maak net meer

oor die langtermyn stel ons net teleur

Ons is maar wild
Verwildere goed
Wat die waarheid
In die wildernis soek

Wat ek soek
Kan nie aan my verkoop word nie
Wat ek soek is verniet

Dis om huis toe te wil kom
dis om ’n koue bier te geniet
en die mooi dag in sy moer te stuur

dis om veilig binne te kan wees as die wind hard huil
en die koue reën daar buite is

dis om te weet dat daar mense is wat jou sal af help
as jy op jou perdjie spring
en jou sal op help as jy aanjaag
en uit laat as jy wil verken

dis om uit jou buik uit te kan lag en dit te bedoel
dis om te weet wat jy soek
dis om te sing tot dit pyn
en te kan huil voor jou vriende

dis om te dink jy weet wie jy is
en te aanvaar dat jy meeste van die tyd
die pot mis sit

jou land is waar die son opkom en weer gaan sak

Ons is ruimtevaarders, automechanics, drop-outs en dokters
Ons is strokiesprenthelde, boggerops, seuns en dogters
Ons is miljoenêrs en presidente, rockers en rugbyspelers, gelowiges en besetenes

Ons almal is
mense het hul grense self uitgedink

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

3 Kommentare

Ansie Geldenhuys ·

Pragtig, sou net in diegedig van ‘n baba se opregte glimlag wou lees – so opreg

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.