Uittreksel: Toorwoorde roep my deur Valiant Swart

die skoene moet jy dra

Geneem uit Toorwoorde roep my deur Valiant Swart

al die paaie wat jy loop
al die draaie wat jy stap
al die strikke wat jy aftrap
al die grond wat jy koop
gaan sit in jou knieë
en die klere aan jou lyf
en klou aan jou treë
en trek jou rieme styf

al is jou spore vergete
al is jou sole verslete
al is die pad lank en swaar
die skoene moet jy dra

al die spoke wat jou jaag
al die spore wat jy trap
elke keer wat jy ontsnap
elke hek wat jou vertraag
skiet wortel in jou bloed
en rank tot in jou vuis
en klou aan elke voet
wat jou dra tot by die huis

al is jou spore vergete
al is jou sole verslete
al is die pad lank en swaar
die skoene moet jy dra

jou verlede
klou verbete
aan die veters
van jou gewete

al is jou spore vergete
al is jou sole verslete
al is die pad lank en swaar
die skoene moet jy dra
die skoene moet jy dra…

Laurika Rauch sing die gedig in die volgende video:

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae