Argieffoto (Foto: David Mark/Pixabay)
Daar is talle uitdrukkings, vergelykings en spreekwoorde in Afrikaans waar “koffie” die onderwerp is. Kan jy aan nog ‘n paar dink?
Die pen is op die koffie.
-Die pen is stukkend.
Dis koffie sonder ketel.
-Dis sterk drank.
Hy kom altyd op die koffie daar.
-Hy kom ongenooid op etenstyd daar aan.
Iets is daar nie suiwer koffie nie.
-Daar is moeilikheid. Iets is verkeerd.
Nee wat, jou koffie is vol vlieë.
-Jy misgis jou.
Ek is op die koffie met my werk.
-My werk het agter geraak.
Haar ma se koffie smaak nie meer lekker nie.
-Gesê as ‘n kêrel nie meer by die meisie wil kuier nie.
Koffie wil hy hê, of die boer bly lê.
-Boere is baie lief vir koffie.
Hy jaag sy koffie deur die vlei (op die vlakte).
-Hy gooi dit in die piering om koud te word voor hy dit drink.
Daar is moer in die koffie.
-Die saak sal nie sonder moeilikheid eindig nie.
Ons drink die koffie soos die kan dit skink.
-Ons aanvaar dinge soos wat ons dit ontvang.
Gee ‘n boer koffie, dan loop hy.
-Wanneer dit koffie- of etenstyd is, is die boer altyd weg.
Hy koffie maar aan.
-Hy sukkel aan.
Sy geheue is op die koffie.
-Hy onthou nie goed nie.
Hy drink die koffie van sy mamma af.
-Hy drink dit swart en bitter.
Dis koffie en melk.
-Dis gemengde bloed.
Jy is sommer op die koffie.
-Jy praat onsin.
Hy drink sy koffie soos oom Paul.
-Hy gooi die koffie in die piering om af te koel.
Sy koffie is vroeg reeds omgeroer.
-Daar is lank gelede vir hom geldelik voorsien.
Hy sal nog sy koffie kry.
-Daar sal nog met hom afgereken word.
Hy het êrens ‘n trekseltjie koffie gaan vra.
-Hy gaan kuier iewers by ‘n nooi.
Jy kan die koffie met ‘n mes sny.
-Die koffie is baie sterk.
Die koffie ruk jou agteroor.
-Dis baie sterk.
Wat van ‘n klein tandjie koffie?
-Kan ek vir jou ‘n bietjie koffie aanbied?
Sy kan darem al koffie skink.
-Sy is al groot genoeg om te trou.
Die koffie is moeg.
-Dis flou koffie.
Haar koffie vlek die koppie.
-Sy maak baie sterk koffie.
Hulle is lief vir koffie drink.
-Hulle skinder graag.
By haar is sy koffie bitter.
-Sy hou nie van hom nie.
Hy moet swart koffie drink om ‘n skaduwee te maak.
-Hy is baie maer.
Hy drink swart koffie, sonder suiker.
-Hy is erg swartgallig.
Hy lieg die melk uit jou koffie uit.
-Hy vertel geweldige leuens.
Hy is so skelm dat hy die melk uit jou koffie sal steel.
-Hy is uiters geslepe.
Wanneer kry ons dan soet koffie?
-Wanneer trou julle?
Jou koffie stort nou-nou.
-Jou probleme is naby.
