Uitdrukking: Op sterk water sit en ander uitdrukkings

Foto ter illustrasie. (Foto: Lubomirkin/Unsplash)

Stille waters diepe grond; water in ʼn mandjie dra; op sterk water sit; in troebel water visvang… Taaltoffie ondersoek ʼn paar uitdrukkings waarin “water” voorkom.

Ons ken almal die uitdrukking stille waters diepe grond wat gewoonlik gesê word van ʼn stil persoon wat nie met mooi of goeie planne of gedagtes besig is nie. Die byvoeging onder draai die duiwel rond het in Afrikaans ontwikkel en dit gee ʼn kwade betekenis aan ʼn voorheen neutrale uitdrukking.

Jou aan kou(e) water brand beteken om oordrewe versigtig te wees. Dié uitdrukking is moontlik ontleen aan katte en honde wat vir koue water bang is as hulle hul voorheen met warm water gebrand het.

Het jy al koue water op iemand se planne gegooi? Dit is wanneer jy ʼn persoon ontmoedig om iets te doen.

Om water in ʼn mandjie te dra is om die onmoontlike te probeer doen.

Van die eerste water verwys na iets van die hoogste gehalte. Eintlik water van die eerste graad van suiwerheid; ontleen aan ʼn edelsteen waarvan die glans “water” genoem word omdat die kleurskakering en die glinstering aan golwende water herinner.

Op sterk water sit beteken om iets as aandenking te bewaar. “Sterk water” verwys na versterkwater, byvoorbeeld formalien, waarin die weefsel van byvoorbeeld ʼn liggaamsmonster nie ontbind nie, maar bewaar bly.

Wanneer ʼn persoon in tye van verwarring eie voordeel behaal, sê ons hulle het in troebel water visgevang. In troebel water kan visse nie so maklik die aas, en dus die hoek, sien nie en word hulle dus makliker gevang. In Nederlands was die spreekwoord “in troebel water goed visvang”.

Die water van die see kan iemand nie skoon was nie word gesê as iemand iets onvergeefliks gedoen het. Dit beteken al gebruik ʼn mens al die water in die see sal dit nog nie help nie.

Om Gods water oor Gods akker te laat loop beteken om jou oor niks te bekommer of aan iets te steur nie.

Moenie die vuil water weggooi voordat jy skones het nie is ʼn waarskuwing dat jy nie die oue moet weggooi voor jy die nuwe het nie.

Bronne: Spreekwoorde en waar hulle vandaan kom en Wat praat jy!

  • Ter wille van die konteks van hierdie taaltoffie en ter wille van erkenning aan die bron versoek ons dat jy nie bloot net ʼn skermskoot van hierdie taaltoffie op sosiale media sal deel nie, maar eerder die skakel van die Toetentaal-plasing sal gebruik. – Red.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.