Uitdrukking: Skering en inslag wees

Argieffoto (Foto: jhenning/Pixabay)

Uitdrukking:
Skering en inslag wees.

Betekenis:
Die gewoonte, tradisie wees.

Waar kom dit vandaan?
Verskeie bronne verduidelik dat skering na die lengtedrade van ʼn weefsel verwys, terwyl inslag die dwarsdraad is wat deur ʼn skering loop. Dit is van toepassing op vlegwerk soos by ʼn weefproses waar drade eers dwarsoor oor ʼn raamwerk gespan word en daarna met ander drade reghoekig of skuins deurgevleg word.

Spreekwoorde en ander segswyses sê omdat hierdie weefproses onveranderlik bly, word dit dus aanvaar dat die wewer se optrede ook altyd dieselfde bly. Die uitdrukking “skering en inslag wees” kom dus neer op ʼn verwysing na iets wat ʼn fundamentele of onafskeidbare deel van ʼn groter geheel is.

  • Gasvryheid is die skering en inslag van ʼn plattelandse gemeenskap.
  • Om stories rondom die kampvuur te vertel is die skering en inslag van ons familie se kampeertradisies. Dit is waar herinneringe gekoester en nuwes geskep word.

Bron: Handwoordeboek van die Afrikaanse Taal (HAT), Spreekwoorde en ander segswyses, Woordeboek van die Afrikaanse Taal (WAT)

  • Ter wille van die konteks van hierdie taaltoffie en ter wille van erkenning aan die bron versoek ons dat jy nie bloot net ʼn skermskoot van hierdie taaltoffie op sosiale media sal deel nie, maar eerder die skakel van die Toetentaal-plasing sal gebruik. – Red

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.