Luister: Amerikaner leer Afrikaans ter nagedagtenis aan SA ma

Matthew Haines en sy ma, Anne-Marie, tydens ‘n vakansie in 2004. (Foto: Verskaf)

Die Amerikaner Matthew Haines se ouers het hul drie kinders meer as 40 jaar terug opgepak en vanaf Kaapstad na Silicon Valley in Kalifornië in die VSA verhuis, ontwetend dat nóg ʼn kleinding sy opwagting nege maande later sou maak.

In 2016 het dié einste baba, nou ʼn volwasse man met ʼn gesin van sy eie, weer gekies om sy vrou en kinders op te pak en terug te keer na sy ouers se geboorteland.

Hy en sy vrou het nes sy ouers kort daarna óók hul vierde bondel vreugde in ʼn nuwe land verwelkom.

“Ja-nee, kyk, die sirkel is nou mooi voltooid,” het Haines onlangs in sy eg Kaliforniese aksent aan Maroela Media vertel.

Deesdae woon hy en sy gesin in Vishoek, ʼn idilliese kusdorpie sowat 40 km buite Kaapstad, en hoewel hy nog ʼn swaar Amerikaanse aksent het, is sy wortels nog altyd diep in Suid-Afrikaanse grond gebêre.

Haines het onlangs opslae oor radiogolwe gemaak toe hy as deel van 5FM se “Make me win”-insetsel op die 5Drive-middagprogram ingeskakel het om te vra of die span hom kan help leer om Afrikaans te praat.

Anne-Marie Haines. (Foto: Verskaf)

Nick Hammon, mede-aanbieder van dié radioprogram, het aan Maroela Media verduidelik dat dié insetsel luisteraars die geleentheid wil bied om nuwe vaardighede en talente, wat hulle nog altyd wou aanleer, byvoorbeeld kookkuns, te slyp.

Haines het aan die radiostasie vertel dat hoewel sy ouers albei Suid-Afrikaners is en sy ma Afrikaanssprekend is, hy nooit dié taal leer praat het nie.

Sy droom is dus om sy Afrikaanse ma – wat ses jaar terug haar kort stryd teen kanker verloor het – te eer deur haar moedertaal te leer praat.

Die radiostasie het hande met VivA en RSG gevat en voorgestel dat Haines as ʼn oefenlopie Antjie Krog se gedig “Ma” oefen en in die radioprogram voorlees. Hulle het ook ingestem om hom op sy Afrikaanse reis by te staan en te motiveer.

Haines vertel dat dié tranetrekker-oomblik hom opnuut gemotiveer het om Afrikaans baas te raak. “My ma was ʼn regte ‘boere-tannie’ en het ons met ʼn sterk hand, maar met baie liefde grootgemaak. Ek wil haar graag trots maak en eer op hierdie manier.”

Sy pa is ʼn voormalige sagtewareontwikkelaar by IBM en het in die 1980’s die geleentheid gekry om vir ʼn sustersmaatskappy in die VSA te gaan werk.

Hy vertel dat sy ouers nog nie getroud was toe dié geleentheid oor sy pa se pad gekom het nie en hulle het boonop albei kinders uit vorige huwelike gehad.

“My pa sê toe basies vir my ma dat hy lief is vir haar en wil hê sy moet saam met hom Amerika toe gaan, hulle gaan net eers moet trou. Sy het gedink dis baie romanties en hulle is kort daarna in die hof getroud en pak toe hul tassies vir ʼn nuwe lewe. Nege maande later was ek as’t ware hul daknatmaak-geskenk gewees,” vertel Haines.

Anne-Marie Haines en haar oudste kleinseun, Aiden, in 2002. (Foto: Verskaf)

Die Haines-gesin het gereeld in Suid-Afrika kom kuier en hy het veral tussen Junie en Augustus, tydens die lang Amerikaanse skoolvakansies, tyd by sy familie in Suid-Afrika deurgebring.

Hy sê hy kon danksy blootstelling aan die Afrikaanse kant van sy familie ʼn paar Afrikaanse woorde en terme verstaan, maar het dit nooit vlot leer praat nie.

“Danksy my ooms ken ek natuurlik byna elke Afrikaanse vloekwoord en ek het as kind ook baie, baie mooi verstaan as my ma kwaad was, want dan het sy met my in Afrikaans geraas,” vertel hy laggend.

“Ek wil egter Afrikaans die respek gee wat dit verdien en dit tot die beste van my vermoëns leer praat.”

In dié podsending vertel hy meer oor die spesiale verhouding wat hy met sy ma gehad het, hoekom hy besluit het om sy gesin terug na Suid-Afrika te laat verhuis en hoe hy nou beplan om sy ma se moedertaal onder die knie te kry.

Luister boaan die berig.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

2 Kommentare

Nettie ·

Vreemde storie, om te hoor van iemand wat uit die VSA eerder hier kom bly. Baie interessant. En hoe oulik dat die sirkel so voltooi is met sy eie 4de baba wat weer hier gebore is. Klink of hy goeie aanklank hier het met sy familie en wortels. Ons kan uit Afrika uit, maar Afrika kom nooit uit ons uit nie! Ek hoop hy gaan voort om ons pragtige taal te leer praat, en dit ook weer aan sy kinders te leer.

Treurwilger ·

Interessante familie!
Haines moet darem net onderskeid tref tussen Kalifornië (toevallig Demokraat-beheer en oorval deur ‘immigrante’) en die res van Amerika.
Ek was bevoorreg om ‘n lang ruk aan die oostekant in die Carolinas te kuier en dis hemel op aarde.
Skoon, waterryk, vriendelik en veilig.
Om Suid-Afrika se wonderlike eienskappe te geniet, met ‘n VSA – paspoort in die agtersak, is om jou brood aan albei kante gebotter te hê.
Die Haines-gesin is ‘n aanwins, waar hulle ook al woon.

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.