SA gasheer vir ‘Week van Nederlands’

Die Week van Nederlands, wat vanjaar die sewende keer aangebied word, vind van 2 tot 9 Oktober plaas.

Vergeet vir ʼn oomblik van jou Covid-19-sorge en kom kuier saam wanneer Nederland, België en Friesland die Nederlandse taal wêreldwyd vier.

Die Week van Nederlands, wat vanjaar die sewende keer aangebied word, vind van 2 tot 9 Oktober plaas. Dit is ook die eerste keer dat Suid-Afrika die gasheerland vir hierdie geleentheid is.

Feesgangers kan nader skuif vir ʼn stampvol program met aktiwiteite soos insiggewende gesprekke, taaldebatte, lesings, slypskole en optredes.

Vanjaar is die tema vir die openingsgeleentheid “Taal is mag”. Antjie Krog, die Suid-Afrikaanse digter en skrywer wat deel van die openingsaand is, het vir ʼn groot deel van haar skryfloopbaan op hierdie onderwerp gefokus.

De Taalkrant, amptelike mondstuk van die fees, is reeds digitaal beskikbaar en maak vanjaar ook voorsiening vir feesgangers met sig- en fisieke gestremdhede. In samewerking met Luisterpuntbibliotheek en Passend Lezen-biblioteekdiens het die organiseerders ʼn braille-weergawe van die taalkoerant laat druk wat aanlyn bestel kan word.

“Nederlands kyk oor alle grense heen, met ʼn volstruis as embleem en ʼn taal op stelte,” lui ʼn verklaring deur die Suid-Afrikaanse Sentrum vir Nederland en Vlaandere (Sasnev).

Iets oor die volstruis

Om “iets op stelte te plaas” is ʼn Nederlandse uitdrukking wat losweg vertaal sou kon word as om dit in beroering te bring. Die volstruis met die lang pote en lang nek kan ver kyk, oor grense heen. Dit kan dans en daardie steltbene gebruik om ver te hardloop.

Boonop sê Maarten Vidal, beleidsekretaris van die Taalunie, daar is ʼn uitdrukking in Afrikaans: “Sy is nes ʼn volstruis, waar sy kom, daar is sy tuis.” So is die Nederlandse taal ook. Sy is steeds tuis in die monde van talle sprekers oor grense heen.

Die naelstring steek grense oor na Kaaps, Fries en Afrikaans

Vanuit Suid-Afrika, saam met die viering van Nederlands as taal, sal Kaaps, Fries en Afrikaans ook aan die woord kom. Met gesprekke oor die rol van Fries in ʼn Nederlandse omgewing en waar Kaaps by dit alles inpas, of dalk juis nie inpas nie. Dit kan interessant raak!

Die feesaktiwiteite wat in Suid-Afrika plaasvind, word in samewerking met die Afrikaanse Taalraad, Frysk Tresoar (Frysk Histoarysk en Letterkundich Sintrum; Sentrum vir Friese geskiedenis en letterkunde), Sasnev en Zuid-Afrikahuis in Amsterdam moontlik gemaak.

Rolprentvertonings, gesprekke en heerlike kos

Vir Suid-Afrikaners is daar twee inryvertonings, verskeie aanlyn en regstreekse gesprekke, ʼn kortfliekkompetisie vir voor- en nagraadse studente van Nederlands en, uiteraard, heerlike versnaperinge.

Die Week van Nederlands word deur die Vlaams-Nederlandse Huis deBuren bestuur en deur die Nederlandse Taalunie gefinansier. Met behulp van die Nederlandse, Belgiese en Vlaamse diplomatieke korps, en met die steun van die Suider-Afrikaanse Vereniging vir Neerlandistiek (SAVN), word die fees by Sasnev se sentrum in Pinelands, Kaapstad, aangebied. Feesgesprekke sal hier plaasvind, terwyl sommige gesprekke aanlyn op Voertaal se webwerf te sien is. Die Vrystaat Kunstefees tree as platformvennoot op.

Besoek die Week van Nederlands se webwerf om meer oor die fees te wete te kom.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.