Talle gebruikers van Afrikaans struikel soms oor die betekenisverskille tussen besonder, besonders en sonderling.
Dit is ‘n besonder (“baie”) deftige uitrusting vir ‘n besonderse (“buitengewone” of “spesiale”) geleentheid.
Besonder kan ook “spesifiek” beteken: Die besondere geval waarna jy verwys.
Sonderling beteken “vreemd” of “eienaaardig”.
besonder
1 Eie, afsonderlik, op homself: My besondere belange
2 Anders as die gewone; apart, buitengewoon: Die jong meisie is werklik besonder mooi
3 In ‘n baie hoë graad: Dis ‘n besondere guns, eer, toekenning
4 Buitengewoon: Dis nou iets besonders
In die uitdrukking: in die besonder, spesiaal veral
besonders
1 Apart: Elkeen besonders
2 Seldsaam: ‘n Besonderse gebeurtenis; dit is ‘n besonderse naam
3 Buitengewoon: Besonders klein, groot, lelik
sonderling
(as byvoeglike naamwoord en bywoord) Eienaardig, vreemd, raar; sonderbaar: ‘n Sonderlinge voorval. Jou sonderling gedra. Dis ‘n sonderlinge gesig, iets wat mens nie dikwels sien nie.
(as selfstandige naamwoord) Sonderlinge, eksentrieke mens: Hy is ‘n sonderling. Omdat sy so ‘n sonderling is, het sy waarksynlik nie haar kursus voltooi nie (JM gilfillan)
Hierdie brokkie is gepubliseer in die boek: Skryf Afrikaans van A tot Z
Uitgewer: Pharos
Prys: R425-00*
* Prys onderhewig aan verandering