Argieffoto (Foto: Benjamin Sz-J./Pixabay)
Die woorde “lei” en “ly” klink dalk dieselfde, maar hul betekenisse verskil. Maak seker dat jy nie die verkeerde spelling gebruik nie!
lei
1 (a) ’n mens/dier êrens heen neem deur voor hom/haar uit te loop of hom/haar saggies in ’n bepaalde rigting te trek: ’n blinde lei • ’n ou dame aan die arm neem en haar oor die straat lei • ’n perd na water lei • Waarheen lei hierdie paadjie? ♦ (ook figuurlik): iemand in die versoeking lei.
(b) in ’n bepaalde rigting laat groei: Lei die ranke teen die muur op.
(c) in ’n bepaalde rigting laat vloei: water op die lande lei.
2 (a) aan die hoof staan van ’n maatskappy/organisasie/land/groep wat iets probeer doen; die leiding neem: Sy het die party twaalf jaar lank gelei. • Die kaptein het sy span na ’n oorwinning gelei. • ’n ondersoek lei • ’n leidende figuur. • die leidende gedagte.
(b) in beheer van iets wees: ’n bespreking/vergadering lei.
3 iets laat gebeur of iemand iets laat doen: Wat het tot die uitbreek van die oorlog gelei? • Jou wangedrag kan daartoe lei dat jy geskors word. • Al ons moeite het tot niks gelei nie.
4 wat betref jou tyd/lewe, dit voer/deurbring soos genoem: ’n woelige/bedrywige/rustige/sorgelose lewe lei.
ly
1 smart/pyn/skade ondervind; in ellende verkeer: ’n sieke wat in stilte ly • onder ’n diktator ly • ly onder vernedering.
2 ondervind; ondergaan: aan ’n siekte ly • honger/dors/vervolging ly • Eet en ly wat daarop volg.
