‘Kaalvreters’, ‘kuikendief’ en ander woorde uit die Bybel

Foto ter illustrasie (Foto: Christiaan Kooyman via Wikimedia Commons)

Hier volg ʼn uittreksel uit Kolokwinte en Kapitele deur Barry Torlage.

Die lys woorde (en etlike uitdrukkings) wat hier aangetoon word, is nie bedoel om teologiese of taalkundige verklarings te bied nie. Dit is slegs bedoel om die leser in staat te stel om so vinnig moontlik ʼn woord wat in die Bybelteks teëgekom word te verstaan. Verdere navorsing vir dieper insig kan met behulp van woordeboeke, kommentare, ensiklopedieë en verklarende Bybels gedoen word.

barensweë: Die lyding van ’n vrou tydens die geboorteproses. (“Geboortepyne” is die krampe vóór die geboorte plaasvind, terwyl “barensweë” die pynlike proses self is).
Hosea 13:13: Barensweë sal hom oorval, hy is ’n onverstandige kind; want as die tyd daar is, stel hy hom nie in die kindergeboorte nie.

botterwoorde: Woorde uitgespreek deur iemand wat ’n “gladde mond” het, byvoorbeeld wanneer ’n booswig jou heuning om die mond smeer.
Psalm 55:22: Glad is die botterwoorde van sy mond, maar sy hart is oorlog; sy woorde is sagter as olie, maar hulle is ontblote swaarde.

heuningdou: Graansiekte as gevolg van reën en koue.
1 Konings 8:37: As daar hongersnood is in die land, as daar pes is, as daar brandkoring, heuningdou, sprinkane, kaalvreters is, as sy vyand hom in die land, in sy poorte dit benoud maak, watter plaag, watter siekte ook al…

hoereloon: Inkomste uit die prostitusie van ’n vrou.
Deuteronomium 23:18: Jy mag geen hoereloon of hondeprys in die huis van die Here jou God as enige gelofte-offer bring nie; want dié altwee is vir die Here jou God ’n gruwel.

kaalvreters: Sprinkane wat alle plante voor die voet opvreet en uitwis.
1 Konings 8:37: As daar hongersnood is in die land, as daar pes is, as daar brandkoring, heuningdou, sprinkane, kaalvreters is, as sy vyand hom in die land, in sy poorte dit benoud maak, watter plaag, watter siekte ook al…

kapitele: Versierde bo-stuk van ’n pilaar.
1 Konings 7:16: En hy het twee kapitele gemaak om op die toppe van die pilare te sit, gietwerk van koper; vyf el was die hoogte van die een kapiteel, en vyf el was die hoogte van die ander kapiteel.

kolokwinte: bitterappel/komkommeragtige plant.
1 Konings 6:18: En sederhout was aan die huis binnekant: snywerk van kolokwinte en oop blomknoppe, dit alles van sederhout; geen klip was daar te sien nie.

kuikendief: ʼn Ongespesifiseerde roofvoël.
Deuteronomium 14:13: … en die kuikendief en die valk en die gier na sy soorte…

mensebande: Uitdrukking wat “met liefde” of “met medelye” beteken (Engels: “compassion”).
Hoséa 4:11: Met mensebande, met koorde van liefde het Ek hulle getrek; en Ek was vir hulle soos diegene wat die juk van hulle kakebeen af oplig; en Ek het My na hom neergebuig, Ek het hom voedsel gegee.

stofkruipers: slange.
Deuteronomium 32:24: As hulle uitgeput is van honger en verteer deur koorsgloed en dodelike siekte, sal Ek die tand van wilde diere teen hulle loslaat met die gif van stofkruipers.

***

Die uittreksel is goedgunstig deur Lig en Duisternis Uitgewers verskaf. Kolokwinte en Kapitele kos R55 en is beskikbaar per bestelling. Om die boek te koop stuur ʼn e-pos na [email protected] of skakel 012 362 1390 om meer te wete te kom.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.