Woord:
salaris (selfstandige naamwoord)
Betekenis:
Betaling, gewoonlik ‘n vaste bedrag op ‘n maandelikse basis, vir diens deur ‘n werknemer gelewer.
Waar kom dit vandaan?
Uit Nederlands salaris (eerste optekening in Die Bybel, waarna in 1622). Eerste optekening in Afrikaans in Patriotwoordeboek (1902).
Ndl. salaris kom uit Frans salaire uit Latyn salarium “soutrantsoen, salaris” uit Latyn sal “sout”. Gestandaardiseerde hoeveelhede sout word vandag nog as betaalmiddel in sommige dele van Afrika gebruik.
Hierdie interessante brokkie is aan Maroela Media se Taaltoffie verskaf deur die Woordeboek van die Afrikaanse Taal.