Woord:
altoos
Betekenis:
altyd
Waar kom dit vandaan?
Die woord kom uit Nederlands altoos (al Middelnederlands).
Nederlands altoos het deur weglating van die velêre klank (klanke wat naby of teen die sagte verhemelte gevorm word) voor s ontstaan uit altoogs, altoochs, wat ʼn verkorting is van altoges, ʼn samestellende afleiding met –s van al en Middelnederlands toge, met lasgenoemde van die Middelnederlandse werkwoord tien wat “trek” beteken. Middelnederlands toge beteken vervolgens oordragtelik “gang, tog” en verder “keer, maal”.
Altoos staan derhalwe in verband met Middelnederlands in allen kere en Nederlands telkenmale, waaruit die begrip “altyd” voortvloei.
Bronne: Etimologiewoordeboek van Afrikaans (EWA), Handwoordeboek van die Afrikaanse Taal (HAT)
- Ter wille van die konteks van hierdie taaltoffie en ter wille van erkenning aan die bron versoek ons dat jy nie bloot net ʼn skermskoot van hierdie taaltoffie op sosiale media sal deel nie, maar eerder die skakel van die Toetentaal-plasing sal gebruik. – Red
Volgens die boek, “Op ons Taalakker”, beteken altoos letterlik “by elke trek”.