Woord:
marathon
Betekenis:
langafstandresies van 42,195 km; ook, langdurende taak of handeling
Waar kom dit vandaan?
Genoem na die plek Marathon in Griekeland waar die Atheners die Perse in 490 v.C. verslaan het. Volgens oorlewering het ʼn boodskapper ongeveer dié afstand van die slagveld na Athene gehardloop met die nuus van die oorwinning, en by sy aankoms neergeval en gesterf.
Die marathon is met die Olimpiese Spele van 1896 ingestel; die gestandaardiseerde afstand van vandag dateer van 1924 af.
Tot sover die romantiese weergawe. Die oorspronklike weergawe van die Griekse geskiedskrywer, Herodotus, vertel van die boodskapper, Pheidippides, wat 240 km van Athene na Sparta toe gehardloop het – maar voor die slag en om hulp te gaan soek.
Oorspronklik gepubliseer in Anton F. Prinsloo se Die aap in jou koffie
Uitgewer: Protea Boekhuis
Prys: R200,00*
* Prys onderhewig aan verandering