Woord: spekskiet

Argieffoto. (Foto: White77/Pixabay)

Woord:
spekskiet

Betekenis:
Grootpraat, oordryf of ‘n leuen vertel.

Waar kom dit vandaan?
Uit Ndl. spek schieten (1612 in die vorm Speck-schieter), in die verouderde lett. bet. “met vetbelaaide vuurkoeëls na ʼn vyandelike skip skiet” en die verouderde fig. bet. “iemand met woorde aanval, of reguit die waarheid vertel”. Vetkoeëls was nie juis vlambaar nie, maar het baie gestink as dit brand. Vandaar wsk. die benoeming spekskiet vir “grootpraat, oordryf of ʼn leuen vertel”, omdat leuens beskou kan word as ʼn aanslag op die toehoorder.

Andersins kan die benoemingsmotief wsk. parallel loop aan die Ndl. en Afr. idiome oor vleitaal, onderskeidelik ʼn woordjie uit die heuningtong en iemand die heuningkwas deur die mond trek, omdat spek, soos heuning, as waardevolle lekkerny geag is.

Spekskiet kan dus verwys na leuenaars se pogings om hul redevoering te versier en te bevorder.

Bron: Etimologiewoordeboek van Afrikaans (EWA)

• Ter wille van die konteks van hierdie taaltoffie en ter wille van erkenning aan die bron versoek ons dat jy nie bloot net ʼn skermskoot van hierdie taaltoffie op sosiale media sal deel nie, maar eerder die skakel van die Toetentaal-plasing sal gebruik. – Red