Twee tieners is Saterdagaand in Kaapstad doodgeskiet nadat hulle glo in die spervuur van ʼn bendegeveg beland het.
Kol. Tembinkosi Kinana, ʼn polisiewoordvoerder, het Sondag gesê die voorval het omstreeks 20:00 in Skorpalstraat in Mitchell’s Plain plaasgevind. Twee mense is ook tydens die oor-en-weer-skietery gewond.
“ʼn 12-jarige meisie en ʼn 15-jarige seun is op die toneel dood verklaar. Die ander twee mense is ernstig gewond en na ʼn nabygeleë hospitaal geneem vir behandeling,” het Kinana gesê.
Die polisie ondersoek sake van moord en poging tot moord. Niemand is nog in verband met die skietery in hegtenis geneem nie.
Maroela Media het Woensdag berig dat nóg ʼn tiener in ʼn vermeende bendeverwante skietery gesterf het nadat hy in die spervuur beland het.
Lees meer hier:
Tiener in Kaapstad doodgeskiet