“Die saak is tot 22 Oktober uitgestel,” het Medupe Simasiku, woordvoerder vir die nasionale vervolgingsgesag, gesê. ‘n Legal Aid-prokureur moet vir een van die mans aangewys word. Die drie mans bly in aanhouding.
Paida Fish (19), Samuel Mabena (27) en Chris Moyo (25), staar elk ‘n aanklag van moord en drie aanklagte van roof met verswarende omstandighede in die gesig. Twee van die mans is op 27 September in die Oukasie informele nedersetting in hegtenis geneem nadat die polisie ‘n wenk ontvang het. Die polisie het beslag gelê op ‘n selfoon, voertuigsleutels, ‘n beursie, ‘n handsak, en kontant wat glo tydens die rooftog op 22 September, waartydens Sanders doodgeskiet is, gesteel is.
“Die polisie is toe na ‘n tweede adres en ‘n derde verdagte is hier in hegtenis geneem.
Die drie mans is van Zimbabwe afkomstig.
Sanders was by die Thatch Haven Country Lodge in Bris toe gewapende rowers ingestorm het, en lukraak begin skiet het. Sanders is in sy hand en maag gewond en het die volgende dag by die Kalafong-hospitaal aan sy wonde beswyk.
Die drie mans het op 1 Oktober in die hof verskyn toe die saak tot verdere ondersoek uitgestel is.
Mabena het op dieselfde dag in die hof verskyn in verband met die moord op 5 September van Mauritz Oberholzer, ‘n boer in die Brits-omgewing.
Sanders het die Wêreld Boksorganisasie se swaargewigtitel in Maart 2003 verower nadat hy Vladimir Klitsckho in die tweede rondte uitgeklop het. Hy het vyf jaar later afgetree.