Die video volg onderaan die berig. Meer as 20 motors neem tans deel aan die “stadig ry”-betoging op die N3-snelweg in Johannesburg.
Die betoging, wat deur vakbondfederasie Cosatu gereël is, is teen die e-tolstelsel in Gauteng. Motors het swart en rooi plakkate vertoon met slagspreuke soos, “Moenie e-tolskyfies koop nie” en “Tolgeld op Gauteng se snelweë moet geskrap word”.
Die motors ry almal in een baan en word deur beamptes van die Ekurhuleni-metropolisie en Suid-Afrikaanse Polisiediens vergesel. ʼn Njala-voertuig van die polisie lei die stoet.
“Sowat 30 motors het by die Katlehong-versamelpunt bymekaargekom en na verwagting sal meer betogers op pad by ons aansluit,” het Dumisani Dakile, provinsiale sekretaris van Cosatu in Gauteng, gesê. “Ons is tevrede met die opkoms.”
Hy sê daar is basiese reëls neergelê en almal sal hierby hou.
-SAPA