Die Kaap van Goeie Hoop

Andre Gerber. (Foto: Verskaf.)

Andre Gerber van Upington skryf:

Oor die laaste paar jaar was die debat om te bly of om te emigreer –  ’n warm patat onder jonger middelklas gesinne. Die sluiting van ons landsgrense weens die koronakrisis het wel tot ’n tydelike halt van emigrasie van talentvolle mense uit Suid-Afrika gelei. Die hekke is gesluit en vir eers moet dié wat wou gly, ’n rukkie langer in die land bly.

My eie gesin het baie ernstig oor emigrasie besin en sowat ’n jaar terug besluit om te bly. Ons is egter wel vuisvoos vir slegte nuus oor korrupsie, wanbestuur, misdaad en die pessimistiese uitkyk oor die toekoms in Suid-Afrika. Ons het tasbare hoop dringend nodig. Dis dié dat ek met groot opwinding Phil Craig se meningstuk oor selfbeskikking in die Wes-Kaap gelees het.

Die geluide oor federalisme of sessering in die Wes-Kaap is stadig maar seker besig om spoed op tel. Daar is verskeie groepe wat hulself vir Kaapse onafhanklikheid beywer. Dit is egter nie ’n amptelike DA-beleid nie. Dr. Groenewald van die VF Plus het ’n jaar terug met die parlementsopening gesê dat daar gesprekke oor federalisme op die tafel moet kom. Intussen was die VF Plus egter maar bra stil oor die saak. AfriForum is wel aktief besig om lofwaardige vorms van selfbestuur in “ankerdorpe en -stede” te bevorder. Of dit egter volhoubaar is om jouself in ’n “vrystad” te isoleer, omring deur ’n gebied met diskriminerende en vyandelike beleid teenoor jou kultuurgroep, is egter ’n ope vraag.

Ná Covid-19 gaan verskeie beroepslui die keuse hê om te werk vanaf plekke wat hulle verkies. Ek glo ons toekoms lê in die westelike dele van Suid-Afrika en ek moedig mense wat dit kan doen aan om hulle hier te kom vestig. Dorpe soos George, Oudtshoorn, Swellendam, Clanwilliam, Upington en nog vele meer wag op jul talente en jul beleggings. Ek daag ook die VF Plus en die DA uit om Kaapse onafhanklikheid boaan jul agenda te plaas. Julle sal verbaas wees oor die reaksie. Probeer ons!