My reaksie op die optog van 27 Augustus 2015 op die Potch-kampus

Die NWU se Potchefstroomkampus. Foto: NWU Pukke/Facebook

Die NWU se Potchefstroomkampus. Foto: NWU Pukke/Facebook

‘n Student se ervaring van die protesaksie wat Donderdag by die institusionele kantoor van die Noordwes-Universiteit (NWU) buite die Puk-kampus in Potchefstroom plaasgevind het.

Ek het op 27 Augustus rustig van Minjonet se eetsaal gestap na my koshuis toe. Ek is ’n trotse inwoner van Hombré Manskoshuis.

Ek het gesien dat daar ’n optog by die hekke van die institusionele kantoor was en het nader gestaan om te gaan luister aangesien ek deel van ’n belangegroep van die Universiteit is en belangstel in wat elke party op die kampus te sê het en die mening van alle belangegroepe wil aanhoor. Ek het by die hoek gaan staan, geskei deur pallisadeheinings en ’n hoë hek. Ek het gesien dat daar klomp afgevaardigdes van die Universiteit was om die optoggangers toe te spreek en die Visekanselier, prof Dan Kwgadi, was ook teenwoordig. Daar was ook ’n wit afgevaardigde daar gewees, maar sodra hy en prof Kwgadi deur die hekke gestap het, is hy uitgejou deur die protesskare en daar is aan hom geskree, “We don’t want you here, white man”.

Ek was nogal geskok om so ’n vyandige en aggressiewe reaksie van die protesgangers waar te neem omrede die afgevaardigde duidelik ʼn senior personeellid van die Universiteit is en om hom so uit te jou omdat hy wit is, was vir my absoluut skreiend. Die personeellid het daarna omgedraai en teruggestap na die institusionele kantoor. Dit was vir my duidelik gewees dat die man ontsteld was deur die optrede van die protesgangers.

Daar is baie gepraat, maar ek kon nie verstaan wat gesê word nie aangesien ek nie Tswana verstaan nie, al sou ek dit graag wou verstaan om te bewys dat ek ’n voorstander van gesonde transformasie is. Ek het toe maar na die plakkate gekyk en op die een plakkaat was die woorde, “NWU is racist”, en op ʼn ander een, “Set Lerato Phoofolo free”. Ek het aangeneem dat die plakkaat verwys na die student van Over de Voor wat glo ʼn Huiskomiteelid met ʼn skêr gesteek het.

Op sekere plakkate het ek gelees van transformasie, maar dit het vir my oorhoofs gevoel asof dit gaan oor meer as transformasie. Ek het haat en aggressie van die protesgangers ervaar wat nie hoort by studente van enige kampus op die Noordwes-Universiteit nie.

Die skare het later begin sing en ek en van my wit koshuisvriende het selfs saamgesing omdat ons die liedjies ken en voor ons sokkerwedstryde gesing het.

Die liedjies het egter dinamika verander en in een van die liedjies het die skare hulle hande in die vorm van ’n geweer gemaak en gesing en hipoteties op al die wit mense geskiet terwyl hulle die liedjie sing. Daarna het een van die lede wat aan die skare na die vriend regs van my gewys het hom aggressief begin vloek. Ons as wit studente wat die optog gade geslaan het, is ook verskeie kere met die dood gedreig en gevloek. Miskien het die optoggangers nie bedoel om ons te vloek nie en wou hulle net gehad het dat ons moet reageer sodat ons as rassiste uitgemaak kan word?

Daarna het protesgangers aan die hekke van die institusionele hek begin ruk en daar is deur hulle gedreig dat hulle die hekke gaan afbreek om op die perseel van die Universiteit te kom. Die protesgangers was baie aggressief gewees en die SAPD het twee skokgranate geskiet wat die skare en dreigende geweld ontlont het. Oomblikke hierna is die hekke van die institusionele kantoor egter oopgegooi wat die protesgangers vrylik toegang tot die perseel van die Universiteit gegee het. Een oomblik word al die hekke toegemaak en toe ʼn skare dreig met geweld en dat hulle die Universiteit gaan afbrand, toe word die hekke oopgemaak. Dit maak net nie vir my sin nie. Dieselfde studente wat ons met die dood gedreig het, word toe toegelaat om langs ons verby te stap om ons net weer met die dood te dreig en een student het selfs met ʼn baksteen gemik om ons te gooi. Hoekom word daar skokgranate geskiet deur die polisie om protesgangers te verhinder om ʼn hek af te breek en dan word die protesgangers toegelaat om deur die hek te stap? Twee boodskappe wat nie sin maak nie?

Indien die hekke dan oop moes wees soos wat deur die Universiteit na die optog gekommunikeer is, hoekom het afgevaardigdes van die institusionele kantoor dan eerstens buite met die protesgangers gepraat? Die oomblik toe die protesgangers gewelddadig begin raak, toe word daar deur die afgevaardigdes agter die hekke geskuil? Die protesgangers het na die voordeure van die IK-kantoor gestap en daar verder gepraat en onder andere weer ’n liedjie gesing wat gesê het dat wit mense moet voertsek. Dit het my onwelkom op my eie Universiteit laat voel. Ek het eers na die tyd verneem dat hierdie studente nie eers van ons kampus was nie, maar dat hulle van ander kampusse af gekom het om hier protes te kom hou.

Hierdie hele gebeurtenis het ’n bitter smaak in my mond gelos ten opsigte van transformasie.

Was hierdie protesaksie positief vir transformasie? Ek dink nie so nie. Ons as wit en swart studente van die Potchefstroomkampus van die Noordwes-Universiteit is deur die protesgangers (klaarblyklik van dieselfde Universiteit) gedreig en gevloek en gevra om te voertsek. Volgens my vriende is selfs die swart werkers van die Puk-kampus gevloek en gedreig.

Ek en al my broers in die koshuis en ook in ander koshuise doen baie moeite om te integreer en te transformeer. Nie omdat iemand dit op ons afdwing of omdat dit dalk “vereis” word omdat ons klaarblyklik ʼn te wit kampus is nie, maar ons doen dit omdat ons wil. Ons glo in mekaar en leer van mekaar. Ons speel saam sport en kuier saam. Ons gee om vir mekaar.

Die NWU se Raad het ’n groot taak op hande om hierdie sogenaamde “brand” van die Noordwes-Universiteit te bou en om as akademiese instelling te strewe na ʼn positiewe akademiese milieu vir alle studente sodat ons onsself kan kwalifiseer om in die toekoms van ʼn reënboognasie te belê. Hulle sal bitterlik vinnig hierdie taak by die horings moet pak as hulle dit wil regkry. Om so ’n protesaksie soos gister op die perseel van die Universiteit toe te laat help nie hierdie proses aan nie. Ek kritiseer nie die Raad of die persone wat besluit het om die protesgangers toe te laat op die kampus nie, ek vra net vrae.

Ons as studente van hierdie Universiteit kry verskillende boodskappe. Hierdie kampus moet transformeer maar ander nie. Hierdie groep word op die perseel toegelaat maar nie die ander groepe nie. Hierdie studente mag gedreig word maar ander studente nie.

Hierdie is maar net my ervaring gister gewees en meneer met die baksteen, kom kuier bietjie saam in ons klubhuis en kom speel saam met ons ALMAL sokker voordat jy dreig en oordeel.

Hierdie rubriek is ʼn lesersbrief wat op Maroela Media se webwerf gepubliseer is. Die menings en standpunte wat in hierdie skrywe uitgespreek word, is nie noodwendig die beleid of standpunt van Maroela Media se redakteurs, direksie of aandeelhouers nie. -Red

Deel van: Só sê die lesers

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

32 Kommentare

jongste oudste gewildste
Gerdus

Iets word van ons as PUK studente weggesteek. Erens was daar meer dreigemente. Hoe verduidelik mens die 10+ sekuriteitsbeamptes wat by die koshuisrugby finale om die veld gestaan het? Ek het nie by een van die vorige wedstryde ‘n enkele sekuriteitsbeampte gesien nie.

HEVW

Boetman tenspyte van selfs jou universiteitsopleiding. Die hoeveelste jaar weet ek nie, en al jou eerstehandse belewenisse op die kampus plaas jy jou hoop nog op n reenboognasie. Oogklappe is nie die woord nie, miskien blindheid vanwee indroktinasie en kondisionering. (Pavlov) Ek beveel gaan na die bib en kry die handboek van die destydse Interfakultere wysbegeerte. Bestudeer dit en plaas dit inverband met dit wat jy direk rondom jou waarneem en ook die breere konteks van die huidige staat en al sy departemente. Hierdie mense stel nie belang om saam met jou bal te skop en jou universiteit te deel… Lees meer »

PDS

Daar is een Afrikaanse Universiteit oor. Nie ‘n wit-Universiteit nie. Ek draf klas saam met klomp swart mense, en baie van hul is afrikaans. Dis hoekom hul hier is. Omdat dit afrikaans is. Los dit tog so.

Annwen

Dit is die wrang vrugte van integrasie boetman.

Bruno Stef

Die oproeriges is aangery van hoofsaaklik die Vaaldriehoek se v,d,Bijlpark se kampus waar hulle swak maniere n tyd gelede op laasgenoemde kampus goed tentoon gestel was,Die handvol blanke studente was daar geintemideer en kon kwalik met hulle klasse aangaan daarom wil hulle die Potch Kampus ook onregeerbaar maak om hulle politieke agenda te bevorder en die blankes aan hulle wil te onderwerp.