‘Ons vir jou, Suid-Afrika’

Argieffoto

Argieffoto

Die onderstaande opstel is deur die 18-jarige Roelien Faber van Midstream College vir ʼn skoolopdrag geskryf. Die tema “Die nag het oë” het Faber laat besluit om oor plaasmoorde te skryf.

“Een van my familielede is verlede jaar op ’n plaas vermoor, en ek het gesien hoe dit my jong niggie en nefie aantas en dit was afskuwelik vir my. Ek sien elke dag hoe boere vermoor word en niemand doen enigiets nie. Die regering smeer dit toe en skryf dit af as niks. Ons self het ’n wildplaas en my ouers doen drastiese stappe om seker te maak ons is veilig wanneer ons die stad verlaat vir die plaas. My hele familie boer, en ek weet self dat as my pa se foon lui en dit is een van my neefs of niggies wat hom bel, word almal se bloed yskoud van vrees dat dit iets is wat op die plaas gebeur het.”

Hier volg Faber se opstel, “Ons vir jou, Suid-Afrika”.

Snags, wanneer die boer se deur toegaan en die naggeluide se orkes begin speel, dans die dood vrolik saam op die bittersoet simfonie van tragedie.

Suid-Afrika. Afstammeling van die land van Melk en Heuning, met sy immergroen bome en sy kleurvolle blomme begrawe die donkerste, dodelikste geheime.

Sien, Suid-Afrika is mooi bedags, dis nou as jy universiteitskampusse vermy en enige paaie waar iemand jou kan doodskiet vir jou sonbril. Suid-Afrika sing nog steeds haar verskillende tale as jy van die Voortrekkermonument af staan en kyk, en alles vreedsaam lyk.

Maar sodra ons bloedrooi son afskeid neem van ons mielielande en die leeus begin jag, kom die ware Jakob van SA uit. Jy sal begenadig wees as dit net ’n leeu buite jou huis is. Agter die boer se deur is daar genoeg ammunisie om ’n weermag te onderhou. Agter die boer se deur staan ’n gelaaide geweer.

Buite die boer se deur staan hulle en beplan. Hulle beplan hoe hulle jou 13-jarige dogter gaan verkrag en dan haar keel afsny soos ’n bok. Buite staan hulle en droom oor die boer se huis gevlek met sy eie bloed. Buite staan hulle en beplan hoe hulle die boer se oë gaan uitsteek met die skroewedraaier waarmee hy sy vrou gehelp het vroeër in die kombuis. Buite staan hulle en lag oor die boer se vrou wie se gille soos musiek in hulle ore gaan wees. Buite staan hulle en begeer jou lewe. Buite staan hulle en beplan hoe hulle jou seun in stukkies gaan sny terwyl sy hart klop. Buite staan die hande wat die boer voer. Buite staan donker Afrika se kind.

Sien, Afrika is mooi met oogklappe aan wat ons “hoop” noem. Afrika se sonsak speel die snare van jou hart totdat jy een aand besef dis eintlik die teken van anargie. Afrika is ook net mooi wanneer jy in ’n estate bly en vir die bank werk.

Agter die boer se deur staan ons en kyk hoe Zuma ons land vernietig, die land waarvoor ons so hard geveg het. Agter die boer se deur staan ons en aanvaar die bloed op die Donker Afrika-kind se hande. Agter die boer se deur staan ons en sing met trots “ons vir jou, Suid-Afrika” terwyl ons een vir een stadig met ons eie rykdom vermoor word.

Afrika, o mooi Afrika. Met jou jakarandastrate en jou kulture. Vandag dra ek my Afrikaanse opstel aan jou op en al die boere wat daagliks vir hulle lewens baklei. Insluitend my pa wat jou so liefhet. Aan jou wat dood op elke boer se voorkop geskryf het. Aan jou wat my dood beplan.

Hierdie rubriek is ʼn lesersbrief wat op Maroela Media se webwerf gepubliseer is. Die menings en standpunte wat in hierdie skrywe uitgespreek word, is nie noodwendig die beleid of standpunt van Maroela Media se redakteurs, direksie of aandeelhouers nie. -Red

Deel van: Só sê die lesers

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

63 Kommentare

jongste oudste gewildste
Justa

Absoluut briljant Roelien. Die vraag is hoekom moet sulke wreedheid so n impak op n agtienjarige se gemoed he dat sy daaroor moet skryf om dit uit haar gestel te kry? Tieners moet hulle lewe sorgvry kan geniet en hulle nie bekommer oor barbaarse moorde nie. Al raad vir jou is verlaat die land so gou as jy kan. SA is n land van bloed. Laat die jong tandarts van Afriforum wat VN toe gaan n afskrif saamvat.

Annemarie Pretorius

Hier sit ek en huil, want is ‘n 18 jarige nie veronderstel om te skryf oor al die mooi en die blink toekoms wat daar vir hul wag nie? Hierdie stuk is regtig baie goed geskryf. Wens so dat dinge sal draai dat kinders kan uitsien na ‘n beter toekoms en die mooi in die lewe. Dat dit nie nodig is vir enige iemand om in vrees te lewe nie.

Justa

Jammer dis Solidariteit en sy naam is Philip van Niekerk.

Chantel

Die impak is werklik as jy woon op ‘n plaas en jy elke aand moet bid ‘Hou ons veilig asseblief Here’. Boer bly ‘n keuse… maar ek maak daardie keuse elke dag en is ook dankbaar vir elke sonskyn oggend!

Zet

Vertaal dié opstel in Engels en kry dié talentvolle kind op die Ellen DeGeneres show.