Wie is nou eintlik verward?

Julius Malema tydens die perskonferensie op 13 Oktober 2016 (Skermskoot uit EWN-video van die konferensie)

Julius Malema tydens die perskonferensie op 13 Oktober 2016 (Skermskoot uit EWN-video van die konferensie)

’n Ope brief aan Julius Malema deur Gerhard Papenfus

Ek oorweeg al ʼn geruime tyd of ek op hierdie wyse op jou verbitterde en roekelose dreigemente teenoor die ‘wit’ burgers van Suid-Afrika moet reageer. Die vraag waarmee ek geworstel het, is of jy hoegenaamd ʼn reaksie van hierdie aard waardig is.

Wat my beweeg het om hierdie brief aan jou te skryf, is die feit dat ek myself herinner aan ʼn sekere Duitse leier en die mense wat hy so volkome mislei het. Soos jy, het hierdie man ook groot intellektuele vermoëns gehad, was hy baie gewild en is hy bewonder vir sy leierseienskappe. Hy het ook geweet hoe om miljoene mense te laat inkoop by sy misplaaste populistiese boodskap.

Hierdie man was ook baie gegrief en soos in die geval van alle verbitterde mense, was hy van mening dat hy geregverdig was om daardie emosies te vertroetel en ook om ander te oortuig om dieselfde te doen.

Daar was by hom ook gefokusde haat teenoor sekere mense en gevolglik het hy ʼn strategie gevolg om hulle op elke moontlike manier te marginaliseer. Destruktiewe emosies, wat deur bitterheid veroorsaak is, eskaleer altyd en moet noodgedwonge ʼn uitlaatklep vind.

In die geval van Duitsland, was die volkome marginalisering van diegene wat die Führer so gehaat het, nie genoeg nie. Om hulle te sien ly het nie sy wraaklus bevredig nie. Sy haat en gepaargaande retoriek het gevolglik toegeneem en dit het uiteindelik tot volksmoord gelei. Hierdie leier, as daar op hierdie wyse na hom verwys kan word, het, nadat hy in minder as ʼn dekade ondenkbare smart oor Europa gebring het, in 1945 selfmoord gepleeg.

Tot vandag toe is die noem van sy naam taboe in Duitsland. Sy nalatenskap kan nie in Duitsland gevind word nie. Sy ondergrondse skuiling (soortgelyk aan dié waar alle gewelddadige mense opeindig), is onder ʼn ongeplaveide, onversorgde parkeerterrein in Berlyn (en dit is geen toeval nie – dit is asof die grond in hierdie omgewing vervloek is).

Ek het al dikwels gewonder of iemand die Führer gewaarsku het teen die verwronge rigting wat hy ingeslaan het. As iemand het, het hy nie ag daarop geslaan nie. Hy was sy eie mentor en het ʼn duur prys daarvoor betaal. Selfs diegene wie se dood hy veroorsaak het, het ʼn genadiger einde gehad as hyself. Op sy laaste was die miljoene wat hom gevolg het, óf dood óf het hulself in haglike omstandighede bevind. Hy was nie meer ʼn held nie. Hy het in sy laaste dae die aaklige werklikheid van sy verwronge droom beleef.

Jy, mnr. Malema, sê ‘witmense’ moet nie verward wees nie. Aangesien ek ‘wit’ is, neem ek aan jy rig hierdie advies aan my. Hierdie en al jou ander sinnelose stellings noop my om aan jou te skryf. Ek dink nie dit is net ons ‘wittes’ wat verward is nie, maar ook jy, wat baie, baie verward is.

Wanneer jy sê jy doen nie ʼn beroep ‘op die uitmoor van witmense nie, of ten minste nie nou nie’, kies jy jou woorde baie omsigtig. Doen jy wel ʼn beroep op ʼn volksmoord, maar net nog nie nóú nie, óf doen jy nog nie nou al ʼn beroep op volksmoord nie? Speel jy slegs met die idee? Is dit iets wat jy wil sien gebeur? As jy dink hierdie benadering sal jou volgelinge tot ekonomiese vryheid lei, is jy baie verward. Enigiemand wat al ooit in handelinge van hierdie aard betrokke was, is ʼn lewe van onderdanigheid gewaarborg. ʼn Moordenaar het nie ʼn nalatenskap nie.

Jy kan egter nie ontken dat jy, wanneer jy hierdie uitlatings maak, ʼn saadjie plant in die gedagtes van jou volgelinge nie. Saad, goed of sleg, groei en as hierdie saad vrug dra, sal jou uitlating dien as ʼn bewysstuk in die Internasionale Kriminele Hof. Ek sal nie verbaas wees as iemand reeds besig is om ʼn dossier hieroor by te hou nie.

Jy onderneem goedgunstiglik om ‘nie die wittes die see in te jaag nie’, maar aan hulle ʼn ‘deel’ te gee. ʼn ‘Deel’ van wat, mnr. Malema? Jy is erg verward. Jy het ʼn opgeblaasde begrip van jouself. Dit is nie vir jou, of dié wat jou misplaaste opinie deel, om te besluit wat my ‘deel’ in hierdie lewe mag wees nie. Tot die mate wat jy dink jy kan dit doen, het jy ʼn verwronge begrip van mag en die verantwoordelikhede wat daarmee gepaard gaan.

Hierdie beginsel is nie net op jou van toepassing nie. Dit is nie vir die mens – dit geld vir alle mense – om lukraak oor die lot van ander te besluit nie. Vir hulle wat al probeer het om dit te doen, dalk op die oog af met sukses, het dit altyd skouspelagtig misluk. Diegene wat poog om dit te doen, is altyd die uiteindelike verloorders. Daar is geen uitsondering op hierdie universele wet nie, ook nie in jou geval nie.

Terloops, die ‘deel’ in die lewe wat regtig tel, word nie deur mense uitgedeel nie. Die ‘lewe’ is baie meer as dit.

Dink jy regtig, mnr. Malema, deur net grond te ‘vat’ jy die boeie van armoede sal breek en welvaart aan jou volgelinge sal verskaf? As jy dit glo, is jy daadwerklik verward. ‘Grond’ opsigself bring nie welvaart nie. Dit is die bewerking van grond, met kennis, vaardigheid, deursettingsvermoë, wysheid en bowenal liefde vir die grond, wat die vrug van die land oplewer. Daarsonder gee ‘grond’ jou niks nie. Om grond te ‘vat’ is een ding; om ʼn lewe daaruit te maak en welvaart daaruit te skep, is totaal iets anders. Indien jy weer Zimbabwe sou besoek (wie se uitgediende grondbeleid jy nastreef), gaan net ʼn bietjie verder as die buitewyke van Harare en jy sal sien waarvan ek praat.

Ons neem kennis dat ‘wittes’ in die algemeen en ‘wit monopolistiese kapitaal’ jou uiteindelike teikens is. Om dit jou lewenstaak te maak, is sekerlik jou reg; jou goeie of slegte besluite bepaal tog jou lot. Ek is nie seker of jy alle faktore in ag geneem het, voordat jy hierdie strategiese besluit geneem het nie. Weereens, dink ek jy is baie verward: dink jy regtig dit (die marginalisering van ‘wittes’ en selfs verdere katastrofiese optrede), sal meebring dat jy en jou volgelinge ekonomiese vryheid sal kry? Miskien is dit nie ekonomiese vryheid vir ander wat jy in gedagte het nie; dalk is dit net mag en wraak.

Jou visier is op president Zuma gerig. Volgens jou, is jou primêre strategiese teiken egter ‘wittes’ en ‘wit monopolistiese kapitaal’. As gevolg van die parlement se onvermoë om teen die president op te tree, is jy van mening Suid-Afrika is nie langer ʼn konstitusionele demokrasie nie en doen jy gevolglik ʼn beroep op die ontbinding van die parlement en ʼn vervroegde nasionale verkiesing. Ironies genoeg, dreig jy in dieselfde asem om grond te ‘vat’, ‘deur watter metode ook al’, met ander woorde, binne of buite die konstitusionele raamwerk.

Jy gaan selfs verder: jy maak jouself ook skuldig aan verdere konstitusionele skending deur na ‘wittes’ as ‘besoekers’ in Suid-Afrika te verwys; met ander woorde, mense met minderwaardige konstitusionele regte. Mnr. Malema, weens die feit dat wat jy sê volkome snert is, is jou opinie irrelevant. Wat wel van waarde is, is dat hierdie stellings wys wie jy werklik is. Vir jou is die Grondwet van geen waarde nie.

Terwyl jy konstitusionele voldoening eis wanneer dit by die president kom (en maak geen fout nie, ek is nie ʼn apologeet vir die president nie), dreig jy om self buite die raamwerk van die grondwet op te tree wanneer dit kom by jóú strategiese agenda, wanneer dit jóú pas. Ek dink jou huidige optrede, binne en buite die parlement, waar jy voorgee om te veg vir die beskerming van ons Grondwet, is slegs opportunisties.

Dit is belangrik vir jou om te weet jou begrip van die geskiedenis van Afrika en Suid-Afrika is eenvoudig verkeerd. Miskien is jy bewus daarvan, maar verkies om jou eie weergawe van die geskiedenis voor te hou. As dit die geval is, is dit oneerlik. In ieder geval, jóú weergawe van die geskiedenis is misleidend en gevaarlik.

Daar is diegene – en daar is baie van hulle – wat jou uitlatings nie ernstig opneem nie, wat jou inderwaarheid heel humoristies en vermaaklik vind. Ek is nie een van hulle nie. Die feit dat jy ʼn vyand van die president is, maak jou nie my vriend nie. Volgens jou is dit nie die president wat jou teiken is nie, maar die ‘wittes’. Ek sien jou vir wat jy is; volgens hoe jy jouself definieer. Ek vind geen humor of enige vorm van konstruktiewe gedrag in jou uitlatings en optrede nie.

Daar is nog een ding wat jy moet weet. Onder die mense wat jy so verag en wat jy met soveel geesdrif wil benadeel, is daar geen vrees wanneer hulle jou manewales sien of hoor nie – daar mag dalk enkele uitsonderings wees. Ons sien dit vir wat dit is en ons sal dit gepas hanteer – deur God se genade en oorvloedige voorsiening – wanneer die uitdagings opduik. Intussen moet jy baie mooi nadink oor wat jy doen. Wat jy glo nou in jou guns tel, mag uiteindelik jou ondergang bewerkstellig; die ‘baie’ wat jou tans volg en gebruik, sal eendag in ontnugtering teen jou draai. Getalle opsigself vestig nie noodwendig mag nie. Leierskap vereis wysheid.

Mnr. Malema, ‘dié wat na die swaard gryp, sal deur die swaard omkom’. Hierdie mag nie vir jou goeie nuus wees nie en jy mag dalk nie daarmee saamstem nie, maar hierdie universele wet bly staan. Teenstrydig met jou huidige denke, is dit die ‘vredemakers’ ‘wat die aarde beërwe’. As jy wil hê dit moet goed gaan met jou en jou volgelinge, sal jy hulle aanraai om hierdie benadering te volg. Jy het so baie wat in jou guns tel en jy is geseënd met uitstaande eienskappe. As jy jou energie in die regte rigting kanaliseer, kan jy ʼn volhoubare verskil maak.

  • Hierdie ope brief is deur Gerhard Papenfus, uitvoerende hoof van die National Employers’ Association of South Africa (Neasa). Hy het dit geskryf in sy persoonlike hoedanigheid.

Hierdie rubriek is ʼn lesersbrief wat op Maroela Media se webwerf gepubliseer is. Die menings en standpunte wat in hierdie skrywe uitgespreek word, is nie noodwendig die beleid of standpunt van Maroela Media se redakteurs, direksie of aandeelhouers nie. -Red

Deel van: Só sê die lesers

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

48 Kommentare

jongste oudste gewildste
Oom Kalahari

@Gerhard: Wat ‘n pragtige brief en puik skrywe uit jou pen. Dit is nou waarlik ‘n skrywe wat ek glo op vele se lippe vir lank hang en in hul harte geberg word, maar nie dit wil uitspreek met al die hedendaagse politieke korrektheid nie. God is in beheer en wie is die mens dan om sy werke te wil verander.

Mariska

Baie geluk Gerhard. Jy het dit uitstekend deur gegee. Ons glo iemand gaan dit duidelik in sy moedertaal oordra.

charmaine

Puik…..niemand kon dit beter se nie….kom ons hoop daar is iemand wat bereid is om die Crayons uit te haal om dit aan die rooihuid te verduidelik…..

Wilma

Baie goeie brief.. Ek het al gewonder wanneer gaan iemand iets plaas wat die man kan reghelp..

Leon

Puik! Ek is net bevrees dat ‘n mens iets van integriteit moet hê om die inhoud te begryp.